Բաթումիի «Լեոգրանդ» հյուրանոցում, որտեղ ժամեր առաջ հրդեհ էր բռնկվել, ավարտվել է մարդկանց տարհանումը։ Հրդեհի բոլոր օջախները մարվել են։ Ներկայումս փրկարարները զննում են բոլոր համարները՝ պարզելու, արդյոք այլ մարդիկ կան ներսում։ Այդ մասին լրագրողներին հայտնել է արտակարգ իրավիճակների վարչության ներկայացուցիչ Մամուկա Տուրմանիձեն։ Նախնական տվյալներով, հրդեհի հետեւանքով զոհվել է 12, վիրավորվել՝ 15 մարդ, հաղորդում է «Նովոստի-Գրուզիան»։
Տուրմանիձեի խոսքով, իրենք լրացուցիչ ուժեր են կանչել, քանի որ ծխահարումը տարածվել էր բոլոր հարկերով։ Հրդեհաշիջման աշխատանքներին հարյուր հրշեջներ են մասնակցել։
Նշենք, որ հյուրանոցում գտնվել են «Միսս Վրաստան» մրցույթի մասնակիցները, նրանք չեն տուժել։
ՆԳՆ-ն քրգործ է հարուցել «հրդեհում» հոդվածի հատկանիշներով։ Քննությունը նաեւ պարզելու է, թե որքանով են պահպանել հակահրդեհային անվտանգության կանոնները։ «Լեոգրանդ» հինգաստղանի հյուրանոցի բարձրահարկ շենք է՝ սպա-կենտրոնով եւ կազինոյով։ 2015թ. բացված շինությունը արժեցել է 35 մլն դոլար։