Հայ Ազգային Կոնգրեսի համակարգող Լեւոն Զուրաբյանը դեկտեմբերի 18-ին հանդիպել է Շվեդիայի ԱԳՆ Արեւելյան Եվրոպայի բաժնի փոխտնօրեն Մարտին Հագստրյոմի եւ Հայաստանի գրասենյակի ղեկավար Մարտին Ռոզենի հետ:
Հանդիպման ընթացքում Լեւոն Զուրաբյանը ներկայացրել է Կոնգրեսի տեսակետները Արեւելյան գործընկերության ծրագրի շրջանակներում Հայաստան-ԵՄ համագործակցության հեռանկարների վերաբերյալ: Քննարկվել են նաեւ Հայաստանում ժողովրդավարական ազատությունների վիճակը, մասնավորապես` քաղբանտարկյալների ազատ արձակման, մարտիմեկյան ոճրագործության անկախ հետաքննության անցկացման, Հայաստանում հեռուստատեսային ոլորտի ազատականացման, ժողովրդավարական ընտրությունների անցկացման հետ կապված հարցեր:
Զուրաբյանը ներկայացրել է երկրում ձեւավորված կոռուպցիոն համակարգի արմատական վերափոխման վերաբերյալ ընդդիմության մոտեցումները:
Քննարկվել են նաեւ հայ-թուրքական հարաբերությունների եւ Լեռնային Ղարաբաղի հակամարտության կարգավորման հեռանկարները:
