Ամերիաբանկի թիմը հաղթող է ճանաչվել բանկերի միջեւ անցկացվող ակտիվների եւ պարտավորությունների կառավարման առցանց համաշխարհային 8-րդ մրցույթում /virtual Banking/: Եզրափակիչ փուլը տեղի ունեցավ ս/թ նոյեմբերի 23-ին Հաագայում:
Մրցույթը վերաբերում էր բանկերում ակտիվների եւ պարտավորությունների, ինչպես նաեւ ռիսկերի արդյունավետ կառավարման խնդիրներին եւ նպատակ ուներ նպաստել ֆինանսաբանկային ոլորտի գիտելիքների զարգացմանն ու պրոֆեսիոնալ մակարդակի բարձրացմանը, այլընտրանքային եւ նորարարական գիտելիքների փոխանցմանը, միջազգային փորձի փոխանակմանը, բանկերում ռիսկերի կառավարման ուժեղացմանն ու զարգացմանը:
Մրցույթը կազմակերպվել էր FMO-ի` Նիդերլանդների միջազգային զարգացման բանկի, DEG-ի` KfW Bankengruppe-ի (KfW բանկային խումբ) անդամի, PROPARCO ֆինանսների զարգացման ֆրանսիական գործակալության եւ SimArch Group-ի կողմից:
Մրցանակաբաշխության հանդիսավոր արարողությունը տեղի ունեցավ FMO-ի գլխամասային գրասենյակում: Երկրորդ մրցանակին արժանացավ Supervielle (Արգենտինա) ընկերության թիմը, երրորդ մրցանակին` Ficohsa (Հոնդուրաս)-ի թիմը, չորրորդ հորիզոնականը զբաղեցրեց Bancop SA (Պարագվայ)-ի թիմը:
Ի սկզբանե մրցույթին մասնակցել է 30 բանկ՝ Աֆրիկա, Ասիա, Լատինական Ամերիկա, Եվրոպա/Կենտրոնական Ասիա տարածաշրջաններից:
