Երեւանի Ավան եւ Նոր Նորք վարչական շրջանների ընդհանուր իրավասության դատարանում այսօր՝ նոյեմբերի 29-ին, վերջապես սկսվեց «Սասնա Ծռեր» խմբի 10 անդամի գործով դատաքննությունը:
«Սասնա Ծռերի» անդամների գործը դատարան էր ուղարկվել դեռեւս ամիսներ առաջ, սակայն դատավոր Արտուշ Գաբրիելյանին չէր հաջողվում նիստեր անցկացնել: Որոշում կայացվեց գործը կիսել 3 մասի, եւ առանձնացված մասով նախագահող Մեսրոպ Մակյանը, շատ կարճ ժամանակահատվածում անցկացնել նախապատրաստական փուլը, այսօր հայտարարեց դատաքննությունը սկսելու մասին:
Մեղադրողներից Պետրոս Պետրոսյանը սկսեց հրապարակել մեղադրանքների եզրափակիչ մասը: Նշենք, որ այս մասով որպես ամբաստանյալներ են անցնում Պավել Մանուկյանը, Վարուժան Ավետիսյանը, Արայիկ Խանդոյանը, Գագիկ Եղիազարյանը, Արմեն Բիլյանը, Սմբատ Բարսեղյանը, Արեգ Կյուրեղյանը, Սեդրակ Նազարյանը, Էդվարդ Գրիգորյանն ու Մխիթար Ավետիսյանը:
Նշենք, որ մինչ մեղադրողն ընթերցում էր մեղադրանքների եզրափակիչ մասը, Արայիկ Խանդոյանը պարբերաբար նրան հորդորում էր իրեն ամբաստանյալ, կալանավոր կամ մեղադրյալ չասել, ապա որոշեց հեռանալ նիստերի դահլիճից: Դատավոր Մեսրոպ Մակյանը դատական սանկցիա կիրառեց ամբաստանյալի նկատմամբ՝ հեռացնելով դահլիճից 3 ժամով:
Դատական նիստը շարունակվում է:
