Ազգային ժողովում այսօր կրկին քննարկվել է ԵՏՄ-ից դուրս գալու՝ «Ելք» խմբակցության հայտարարության նախագիծը: Ինչպես եւ սպասվում էր՝ հանձնաժողովում հարցն այդպես էլ բովանդակային քննարկման չի հասել: Կարելի է ասել, բուն թեման Վրաստանից 5 կգ-ից ավելի մանդարին ներկրելու արգելքն է եղել: Պատգամավորները հիշել են Խորհրդային Միության տարիները, Ամանորը եւ հայտնի ասացվածքներ մեջբերել:
Հանրապետական խմբակցության պատգամավոր Արտաշես Գեղամյանի ելույթից հետո էլ «Ելք»-ից Արարատ Միրզոյանն արձանագրել է՝ իշխող կուսակցությունը եւ ընդդիմության մի մասն ընդունում է, որ ԵՏՄ-ից դուրս գալն ընդամենը ժամանակի հարց է, եւ վախենում են, որ Ռուսաստանը վատություն կանի Հայաստանին:
Արմեն Աշոտյանը հիշեցրել է, որ Արտաշես Գեղամյանն իրենց կուսակցության անդամ չէ, ընդամենը խմբակցությունից է, ապա հարցը դրել է քվեարկության: Փաստորեն, երկրորդ անգամ «Ելք»-ին չհաջողվեց ԵՏՄ-ից դուրս գալու հարցը մտցնել Ազգային Ժողովի օրակարգ:
Երեւանի ավագանու այսօրվա նիստը նորից թեժ մթնոլորտում է անցել: Նիստի ընթացքում ավագանու անդամները Երեւանի մի շարք փողոցներ անվանափոխելու եւ հուշատախտակներ տեղադրելու որոշումներ են կայացրել:
Այսօրվա նիստին էլ ակտիվությամբ աչքի է ընկել «Երկիր Ծիրանի» խմբակցությունը. Զարուհի Փոստանջյանը, ի դեպ, նիստին ներկա չէր: Նրա ղեկավարած խմբակցության երկու անդամները չեն դադարել քննադատության ենթարկել Հանրապետականի բերած նախագծերը: Մարինա Խաչատրյանը նույնիսկ հասցրել է զուգահեռներ անցկացնել գործող քաղաքապետի հոր եւ Քիմ Քարդաշյանի միջեւ: Տարոն Մարգարյանը որեւէ կերպ չի արձագանքել «Երկիր Ծիրանիի» անդամի ելույթին: Հավելենք, որ ավագանու որոշմամբ Երեւանն արդեն Լեոնիդ Ազգալդյանի, Մոնթե Մելքոնյանի անվան փողոցներ ունի:
Ալավերդիում այս գիշեր 30-ամյա տղամարդ է սպանվել, մի երիտասարդ էլ մարմնական ծանր վնասվածքներով հիվանդանոց է տեղափոխվել: Հայկ Սիրադեղյանին սպանել են դաժանաբար՝ կտրելով պարանոցը, իսկ Արմեն Մակոյանը դանակի հարված է ստացել որովայնի շրջանում: Իրավապահները բացահայտել են սպանությունն ու սպանության փորձը. ձերբակալվել է 29-ամյա Գարիկը: Նախաքննություն է կատարվում:
Վանաձորում քրեական հեղինակություն համարվող «Ճաճոյի Էդոյի» որդու սպանության գործը 6 ամիս անց կարճվել է: Լոռու մարզի դատախազը որոշում է կայացրել դադարեցնել քրեական հետապնդումը սպանված Տիգրան Մարտիրոսյանի կնոջ նկատմամբ՝ գործուն զղջալու հիմքով: Նախաքննությամբ ապացուցվել էր, որ Մարտիրոսյանի կինն այդ քայլին դիմել է ինքնապաշտպանությունից դրդված: Տեղեկություններ կան, որ «Ճաճոյի Էդոյի» որդին տարիներ շարունակ երեխաների աչքի առջեւ բռնության է ենթարկել կնոջը: Սպանության օրը Մարտիրոսյանը լիցքավորված ատրճանակը պահել էր կնոջ գլխին եւ սպառնացել սպանել, ինչից հետո կինը նրան հրել էր, վերցրել ամուսնու ձեռքի ատրճանակն ու կրակել նրա ուղղությամբ:
«Սասնա ծռեր» խմբի 10 անդամի գործով դատաքննությունն այսօր վերջապես մեկնարկեց: Այս գործը դատարան էր ուղարկվել շուրջ 6 ամիս առաջ, սակայն դատավոր Արտուշ Գաբրիելյանին որեւէ կերպ չէր հաջողվում նույնիսկ նախապատրաստական փուլի նիստերն անցկացնել: Այդ պատճառով էլ գործը բաժանվեց երեք մասի եւ տրվեց երեք դատավորի քննության: Մեսրոպ Մակյանը նախագահող դատավորներից առաջինն է, որը, այսպես ասած, «հաղթահարեց» նախապատրաստական փուլն ու սկսեց դատաքննությունը: Այսօրվա նիստում հրապարակվել են մեղադրանքների եզրափակիչ մասերը:
Հայաստանի իրավապահները միայն 5 տարի անց են կարողացել հայտնաբերել 9 հազար դոլար կաշառք վերցնելու մեջ մեղադրվող եւ հետախուզվող ավագ դատախազ Խաչատուր Բաղդասարյանին: Նրա նկատմամբ քրեական հետապնդումը սկսվել էր 2012 թվականից: Բաղդասարյանը քաղաքացուց 9 հազար դոլար է պահանջել՝ նրան սեփականության կեղծ վկայական տրամադրելու համար: Այդ ժամանակ նրան մեղադրանք էր առաջադրվել եւ հայտարարվել հետախուզում: Նախկին ավագ դատախազին օրերս հայտնաբերել են Ուկրաինայում եւ նոյեմբերի 24-ին տեղափոխել Հայաստան: Խաչատուր Բաղդասարյանը կալանավորված է:
Նախկին Հարավսլավիայի միջազգային քրեական տրիբունալում այսօրվա նիստի ժամանակ գեներալ Սլոբոդան Պրալյակը վերաքննիչ ատյանի դատավճռի հրապարակումից հետո թույն է խմել: Հաագայում քննվում էր Պրալյակի ու եւս 5 բոսնիացի խորվաթների բողոքը, որոնց դատավճիռը ռազմական հանցագործությունների վերաբերյալ կայացվել էր 2013 թվականին: Այդ ժամանակ Պրալյակին դատապարտել էին 20 տարվա ազատազրկման: Դատավարությունն այսօր ընդհատվել է:
Հայտնի է, թե երբ կամուսնանա վերջին ժամանակներում ամենաքննարկվող զույգը: Բրիտանացի արքայազն Հարրին եւ դերասանուհի Մեգան Մարքլը կամուսնանան հաջորդ տարվա մայիսին՝ Վինձորի Սուրբ Գեորգի եկեղեցում: Նշենք, որ զույգը երեկ է նշանվել:
Դոլարը շարունակում է թանկանալ, իսկ եվրոն նվազում է: Նոյեմբերի 29-ին դոլարի փոխարժեքը կազմել է 484.33 դրամ, եվրոյինը՝ 574, ռուբլունը՝ 8 դրամ 31 լումա, ֆունտինը՝ 648 դրամ:
Նոյեմբերի 30-ի գիշերը հանրապետության շրջանների զգալի մասում տեղումներ են սպասվում: Օդի ջերմաստիճանը դեկտեմբերի 1-ի եւ 2-ի գիշերը կնվազի 3-5 աստիճանով, 3-4-ի ցերեկը կբարձրանա 2-3 աստիճանով: Մայրաքաղաքում գիշերը կդիտվի 0+2, ցերեկը՝ +7+9 աստիճան տաքություն:
