Հայաստանի եւ ԵՄ–ի միջեւ ստորագրված համապարփակ եւ ընդլայնված համաձայնագիրը մեծ ձեռքբերում է։ Այս մասին այսօր՝ դեկտեմբերի 1–ին ԱԺ արտաքին հարաբերությունների եւ եվրոպական ինտեգրման հարցերի մշտական հանձնաժողովների համատեղ նախաձեռնությամբ, ինչպես նաեւ «Կոնրադ Ադենաուեր» հիմնադրամի հայաստանյան մասնաճյուղի աջակցությամբ կազմակերպված խորհրդարանական լսումների ժամանակ, հայտարարել է ՀՀ փոխվարչապետ, միջազգային տնտեսական ինտեգրման եւ բարեփոխումների նախարար Վաչե Գաբրիելյանը:
Նրա խոսքով՝ այս համաձայնագիրը կնպաստի Հայաստանի եւ Եվրամիության անդամ երկրների միջեւ հարաբերությունների ընդլայնմանը եւ զարգացմանը: «Մենք մանրամասն քննարկել ենք այդ համաձայնագրի շրջանակներում մեր կողմից ներգրաված ինտեգրացիոն գործընթացները համատեղելու խնդիրները, եւ ես կարող եմ ասել, որ փաստաթուղթն իսկապես հանդիսանում է Հայաստանի կողմից ստանձնած բոլոր պարտավորությունների համադրությունը»,-վստահեցրեց Գաբրիելյանը `հավելելով, որ ըստ այդ փաստաթղթի, Հայաստանը կարող է զարգացնել հարաբերությունները Եվրամիության հետ եւ շարունակաբար խորացնել Եվրասիական տնտեսական միությունում իր անդամակցությունը:
Հիշեցնենք, որ համապարփակ եւ ընդլայնված համաձայնագիրը Հայաստանի եւ ԵՄ–ի միջեւ ստորագրվել է նոյեմբերի 24–ին Բրյուսելում։