Երեւանի քաղաքապետարանի եւ Եվրոպական ներդրումային բանկի միջեւ ստորագրվել է Էներգաարդյունավետության ֆինանսական պայմանագիր:
Քաղաքապետարանից NEWS.am-ին հայտնում են, որ փաստաթուղթը ստորագրել են Երեւանի քաղաքապետ Տարոն Մարգարյանը եւ Եվրոպական ներդրումային բանկի փոխնախագահ Վազիլ Հուդակը:
Պայմանագրի շրջանակում նախատեսվում է քաղաքապետարանի ենթակայության հանրային շենքերում, հատկապես մանկապարտեզներում իրականացնել էներգաարդյունավետության բարձրացման աշխատանքներ: Ծրագրի արդյունքում կկրճատվեն հանրային շենքերի էներգետիկ սպասարկման ֆինանսական ծախսերը, ինչպես նաեւ կնվազի արտանետվող CO2 գազը:
Երեւանի էներգաարդյունավետության ծրագրի իրականացման համար տրամադրվել է 7 մլն եվրո վարկ` ԵՆԲ-ից, 5 մլն եվրո դրամաշնորհ՝ Արեւելյան Եվրոպայի էներգախնայողության եւ շրջակա միջավայրի գործընկերության հիմնադրամից (E5P) եւ 1 մլն եվրո դրամաշնորհ՝ Կանաչ կլիմայի հիմնադրամից:
Պատասխանելով լրագրողների հարցերին` քաղաքապետ Տարոն Մարգարյանն ընդգծել է, որ Երեւանի քաղաքապետարանը Եվրոպական ներդրումային բանկը դիտարկում է որպես իր լավագույն գործընկերներից մեկը եւ պատրաստակամ է այլ ոլորտներում եւս ընդլայնել բանկի հետ համագործակցությունը:
«Ստորագրված այս 7 մլն վարկային եւ 6 մլն եվրո դրամաշնորհային միջոցներով կհիմնանորոգվեն համայնքային մի շարք շենքեր եւ կառույցներ, կիրականացվեն էներգախնայողությանն ուղղված միջոցառումներ, ինչպես նաեւ այդ շենքերի սեյսմիկ ամրացում: Կարեւորելով այս ծրագիրը՝ Երեւանի քաղաքապետարանը եւս կմասնակցի վերանորագման ֆինանսավորման գործընթացին:
Ծրագրի առաջին փուլով կհիմնանորոգվեն Երեւանի քաղաքապետարանի ներքո գործող մանկապարտեզները: Ընդհանրապես, Եվրոպական ներդրումային բանկի հետ մենք երկար տարիների գործընկերային լավ փորձ ունենք եւ այսօր էլ շարունակում ենք մեր համագործակցությունն այնպիսի կարեւոր ոլորտներում, ինչպիսիք են Երեւանի մետրոպոլիտենը եւ կոշտ կենցաղային թափոնների կառավարումը: Ի դեպ, այսօր նախատեսվում է նաեւ ստորագրել կոշտ թափոնների կառավարման ծրագրի մաս կազմող դրամաշնորհային համաձայնագիրը», - նշել է քաղաքապետը:
