«Քաղաքականության մեջ չկան ընկերներ եւ թշնամիներ, կան ազգային շահեր» դիրքորոշումը Հայաստանի համար վտանգավոր է: Այս մասին այսօր՝ դեկտեմբերի 1-ին, ԱԺ արտաքին հարաբերությունների եւ եվրոպական ինտեգրման հարցերի մշտական հանձնաժողովների համատեղ նախաձեռնությամբ, ինչպես նաեւ «Կոնրադ Ադենաուեր» հիմնադրամի հայաստանյան մասնաճյուղի աջակցությամբ կազմակերպված խորհրդարանական լսումների ժամանակ, հայտարարեց ՀՀԿ պատգամավոր Միհրան Հակոբյանը։
Նրա խոսքով՝ նման կարծիք կարող էր արտահայտել միայն 19-րդ դարի Մեծ Բրիտանիայի վարչապետ, «ծովերի տիրակալ» Լորդ Փալմերսթոնը: «Մենք, իրոք, կարիք ունենք գործընկերների թե՛ Եվրոպայում, թե՛ Աֆրիկայում, թե՛ Լատինական Ամերիկայում, եւ այս համաձայնագիր եւս մեկ ապացույց է, որ մենք Եվրամիության հետ մեր գործընկերությունը նոր մակարդակի ենք բարձրացնում»,– նշեց Հակոբյանը` հավելելով, որ այս համագործակցության զարգացումը շարունակական կլինի:
Հիշեցնենք, որ համապարփակ եւ ընդլայնված համաձայնագիրը Հայաստանի եւ ԵՄ–ի միջեւ ստորագրվել է նոյեմբերի 24–ին Բրյուսելում։
