ՀՀ արդարադատության նախարար Դավիթ Հարությունյանն այսօր ընդունել է ԵԱՀԿ/ԺՀՄԻԳ ընտրությունների վարչության պետ Ալեքսանդր Շլիկին, ՀՀ ԱԺ ընտրություններում ԺՀՄԻԳ դիտորդական առաքելության ղեկավարի տեղակալ Դոնալդ Բիսոնին եւ ԺՀՄԻԳ ընտրությունների վարչության խորհրդական Ալեքսեյ Գրոմովին:
Նախարարությունից NEWS.am-ին հայտնում են, որ հանդիպման ընթացքում քննարկվել են 2017 թվականի ապրիլի 2-ի ՀՀ խորհրդարանական ընտրությունների վերաբերյալ ԵԱՀԿ/ԺՀՄԻԳ դիտորդական առաքելության վերջնական զեկույցի առաջարկները, դրանց ուղղությամբ տարվող աշխատանքներն ու համագործակցության հեռանկարները:
Նախարար Հարությունյանը բարձր է գնահատել միջազգային կառույցի առաքելությունը ընտրությունների դիտարկման ընթացքում եւ ներկայացրել մի շարք խնդիրների լուծման, մասնավորապես, վարչական ռեսուրսի չարաշահման դեպքերի բացառման ուղղությամբ ձեռնարկված աշխատանքները: Այդ համատեքստում Դավիթ Հարությունյանը կարեւորել է Արդարադատության նախարարության մշակած ՀՀ ընտրական օրենսգրքում եւ մի շարք հարակից օրենքներում փոփոխություններ եւ լրացում կատարելու մասին նախագծերը, որոնց ընդունման արդյունքում հնարավոր կլինի առավել արդյունավետ պայքար մղել ընտրությունների եւ հանրաքվեի ընթացքում վարչական ռեսուրսի չարաշահման դեպքերի բացառման ուղղությամբ:
