Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով նիստն այսօր` դեկտեմբերի 4-ին, տեղի չունեցավ: Գործով ամբաստանյալներ Գնել Թեւոսյանը, Նորիկ Սահակյանը, Վաչե Սահակյանը եւ Մովսես Ազարյանը քրեակատարողական հիմնարկից դատարան չէին տեղափոխվել: Նշենք, որ այսօր դատարանի նույն դահլիճում կար «Սասնա ծռեր» խմբի գործով դատական նիստ եւ այդ պատճառով է, որ ուղեկցող ոստիկանների զբաղվածության պատճառով քրեակատարողական հիմնարկից չէին կարողացել դատարան բերել ամբաստանյալներին:
Այս գործով վկաների հարցաքննության փուլն է, կուրսանտ Հայկազ Բարսեղյանի սպանության գործով դատակոչված 30 վկա կա, որոնցից 5-ը դատարանում դեռ ցուցմունք չի տվել: Նրանք զինծառայողներ են, իսկ առանցքային վկաներից մեկը՝ Սամվել Սերոբյանը, զորացրվել է եւ այս պահին արտերկրում է:
NEWS.am-ի հետ զրույցում սպանված կուրսանտի հայրը՝ Արկադի Բարսեղյանը դժգոհություն էր հայտնել նիստերի անընդհատ հետաձգման վերաբերյալ. նրա խոսքով, նիստերի անընդհատ հետաձգման պատճառով գործով վկաները չեն հիշում դեպքի վերաբերյալ մանրամասները:
Հայկազ Բարսեղյանի սպանության համար մեղադրվում են նրա համակուրսեցիները` կուրսանտներ Գնել Թեւոսյանը, Նորիկ Սահակյանը, Վաչե Սահակյանը եւ Մովսես Ազարյանը։ Ըստ մեղադրանքի՝ նրանք 2015թ. հունվարի 29-ին՝ ժամը 02:00-ից 03:00-ի սահմանում, զորամասի ննջարանում դաժանությամբ սպանել են կուրսանտ Հայկազ Բարսեղյանին, ապա հետքերը թաքցնելու նպատակով կախել նրա մարմինը մարզահրապարակում գտնվող պտտաձողից, նրա անունից գրություն թողել, թե իբր ինքնասպան է եղել: Ամբաստանյալներն իրենց մեղավոր չեն ճանաչում:
