Սիրիայում ընթացող գործընթացներն ազդում են Հարավային Կովկասի իրավիճակի վրա: Այդ մասին դեկտեմբերի 4-ին՝ լրագրողների հետ հանդիպման ժամանակ, հայտարարել է Հայաստանի Գիտությունների ազգային ակադեմիայի Արեւելագիտության ինստիտուտի տնօրեն, թուրքագետ Ռուբեն Սաֆրաստյանը:
Ըստ նրա՝ ստացվում է, որ իրավիճակը Սիրիայում նոր փուլ է մտնում:
«Ռազմական գործողություններն, ընդհանուր առմամբ, ավարտվել են, եւ սկսվել է բանակցային գործընթացը: Ընդ որում, բանակցային փուլում պետք է լուծվեն բավականին բարդ հարցեր», - հստակեցրել է փորձագետն ու հավելել, որ նմանատիպ բարդ հարցեր ունեն հակամարտության բոլոր կողմերը:
Սաֆրաստյանի կարծիքով այդ պայմաններում Թուրքիան փորձում է օգտվել այն հանգամանքից, որ իր զորքերը մտցվել են Սիրիայի հյուսիսային մի շարք տարածքներ եւ, ամենայն հավանականությամբ, Անկարան կփորձի ուժեղացնել դրանք, ինչը հնարավորություն կտա բանակցային գործընթացում իր համար որոշ հաջողությունների հասնել: Արեւելագետի կարծիքով դա Թուրքիային ոչ միայն որոշ առավելություն կտա, այլ նաեւ պայմաններ կստեղծի այդ հակամարտության մեջ ներքաշված մյուս կողմերի հետ հետագա գործարքի համար:
Ռուբեն Սաֆրաստյանը ենթադրում է նաեւ, որ այս փուլում անդրկուլիսյան բանակցություններ են անցկացվում, որոնք անցնում են դիվանագիտական մակարդակով: Նա չի բացառել, որ «սակարկությունների» շրջանակներում բանակցությունների ընթացքում Անկարան կփորձի բարձրացնել ղարաբաղյան կարգավորման հարցը:
