Պենտագոնի ղեկավար Ջիմ Մաթիսը Պակիստանին կոչ է արել «կրկնակի» ջանքեր գործադրել զինյալների դեմ պայքարում, որոնք հարեւան Աֆղանստանում հարձակումների համար երկիրը որպես հենակետ են օգտագործում, հաղորդում է Reuters-ը: Պակիստան կատարած այցի ընթացքում Մաթիսը հանդիպել է երկրի ղեկավարության հետ: Նա նշել է, որ Պակիստանը առաջընթաց է արձանագրել երկրի ներսում զինյալների դեմ պայքարում, սակայն այն պետք է ավելին անի:
ԱՄՆ-ն հիասթափված է, որ Պակիստանը չի ցանկանում այնպիսի խմբերի դեմ գործել, ինչպիսիք են աֆղանական «Թալիբանը» եւ «Հաքանի» ցանցը, որոնք, ըստ Վաշինգթոնի, Պակիստանում անվտանգ հենակետ են օգտագործում Աֆղանստանում հարձակումներ կատարելու համար:
Մաթիսը, ով առաջին անգամ այցելել էր Պակիստան որպես պաշտպանության նախարար, ուղեւորությունից առաջ հայտարարել էր, որ Պակիստանի պաշտոնյաների հետ հանդիպումների նպատակը «ընդհանուր լեզու» գտնելու փորձը կլինի:
Մաթիսը հանդիպել է նաեւ Պակիստանի Զինված ուժերի բարձրաստիճան պաշտոնյաների, այդ թվում `բանակի հրամանատար գեներալ Քամար Ջավեդ Բայվայի եւ հետախուզության ղեկավար, գեներալ-լեյտենանտ Նավեդ Մուխթարի հետ, որն, ըստ ԱՄՆ պաշտոնյաների, կապեր է պահպանում «Թալիբանի» եւ «Հաքանիի» զինյալների հետ:
