ԱԺ «Ելք» խմբակցության պատգամավոր Էդմոն Մարուքյանն այսօր՝ դեկտեմբերի 5-ին, Ազգային Ժողովում իշխանության ներկայացուցիչներին հարց ուղղեց՝ ինչու են թանկանում մթերային ապրանքները: Նա մեծամասնությանը խորհուրդ տվեց շրջել Հայաստանի մարզերում, գյուղերում եւ բնակիչներին բացատրել՝ ինչու են ապրանքները թանկացել:
«Ես ձեզ առաջարկում եմ այցելել գյուղեր, մարզեր եւ մարդկանց բացատրել, թե ինչու են ապրանքներն ամենօրյա ռեժիմով թանկանում, կամ հունվարի 1-ից ինչու են ապրանքները թանկանալու: Մարդկանց բացատրեք, որ Հայաստանը զարգանում է, ապրանքները չեն թանկացել: Մարդիկ արդեն կարագ են բանկ դնում, որ վարկ վերցնեն, էնքան ա թանկացել: Դրա մասին մտածեք»,-ասաց նա:
Նշենք, որ Հայաստանի ԱԺ-ում ընթանում է հերթական քառօրյայի աշխատանքը. օրակարգում է ԵՏՄ մաքսային օրենսգրքի մասին պայմանագիրը վավերացնելու, Հայաստանի եւ Ռուսաստանի միջեւ՝ Հայաստանի կառավարությանը պետական արտահանման վարկ տրամադրելու մասին համաձայնագիրը վավերացնելու, նաեւ ընտանեկան բռնության կանխարգելման վերաբերյալ նախագծերը:
Օրակարգում է նաեւ «Հաշվեքննիչ պալատի մասին», «Հայաստանի Հանրապետության վերահսկիչ պալատի 2018 թվականի գործունեության տարեկան ծրագիրը հաստատելու մասին» նախագծերը:
Ընդհանուր առմամբ ԱԺ քառօրյա նիստերի օրակարգում ընդգրկված է 41 օրենքի նախագիծ եւ միջազգային համաձայնագիր: