ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանն ընդունեց հեռահաղորդակցության ոլորտում մասնագիտացած «ZTE» չինական կորպորացիայի ներկայացուցիչներին` փոխնախագահ Սյուե Բինի գլխավորությամբ։
Նախարարությունից NEWS.am-ին հայտնում են, որ հյուրերը ներկայացրին ընկերության այս տարվա գործունեությունը, գրանցած հաջողությունները։ Սյուե Բինը հայտնեց, որ ընկերության եկամուտը 2017թ.-ի երրորդ եռամսյակի դրությամբ կազմել է 12 միլիարդ դոլար, որի 10 տոկոսը հատկացվում է գիտահետազոտական ծրագրերին (R&D)։
Ընկերությունը մասնավորապես կենտրոնացած է 5G ստանդարտի զարգացման վրա։
Հայաստանում ընկերությունն ունի միայն վաճառքի ներկայացուցչություն, մի քանի պայմանագրերով աշխատում են հայաստանյան հեռահաղորդակցության 2 օպերատորների հետ` IP հեռուստատեսային ծառայությունների եւ այլ ոլորտներում։
Նախարարն առաջարկեց «ZTE» ներկայացուցիչներին R&D լաբորատորիա հիմնել նաեւ Հայաստանում` հաշվի առնելով մեր երկրում նախադրյալների եւ բարձրակարգ մասնագետների առկայությունը։
Վահան Մարտիրոսյանը նաեւ Կառավարության կողմից աջակցության պատրաստակամություն հայտնեց, եթե ընկերությունը որոշի լայնամասշտաբ որեւէ ծրագիր իրականացնել Հայաստանում։
Հանդիպման ընթացքում քննարկվեց նաեւ տարածաշրջանային Data center-ի (տվյալների մշակման կենտրոնի) ստեղծման նախագիծը։ Նախարարն ասաց, որ ուրախ կլինի, եթե «ZTE»-ն որեւէ ձեւաչափով մասնակցի այս ծրագրի իրագործմանը։