Բելառուսի եւ Ղազախստանի նախագահներ Ալեքսանդր Լուկաշենկոն Նուրսուլթան Նազարբաեւը Ռուսաստանում գլխավորում են ԱՊՀ անդամ պետությունների ամենավստահելի ղեկավարների ցուցակը։ Հասարակական կարծիքի ուսումնասիրության համառուսական կենտրոնի (ՎՑԻՕՄ)–ի տեղեկություններով՝ Լուկաշենկոն վայելում է ռուսաստանցիների 62 տոկոսի վստահությունը, իսկ Նազարբաեւը՝ 56 տոկոսի, փոխանցում է ՏԱՍՍ–ը։
Բելառուսն ու Ղազախստանը ԱՊՀ այն երկրների թվում են, որոնք ամենաշատն են վայելում ՌԴ քաղաքացիների համակրանքն ու աջակցությունը։ Այս պետություններին ամենակայունն ու հաջողակն է համարում հետազոտության մասնակիցների մեծ մասը։ Բելառուսն այդպիսի երկիր է համարում հարցվածների 60 տոկոսը, Ղազախստանը՝ 41 տոկոսը։ Նրանց հաջորդում են Հայաստանը՝ 16 տոկոս, Ադրբեջանը՝ 14 տոկոս, Վրաստանը՝ 10 տոկոս, Ուզբեկստանը՝ 7 տոկոս, Թուրքմենստանը՝ 7 տոկոս, Ղրղզստանը՝ 5 տոկոս, Մոլդովան՝ 4 տոկոս, Տաջիկստանը՝ 3 տոկոս եւ Ուկրաինան՝ 1 տոկոս։
«Ռուսաստանցիները բազմազգ ժողովուրդ են, եւ այս կամ այն երկրի ներկայացուցիչներն իրենց աջակցությունն են հայտնում պատմական հայրենիքին,– նշել է ՄԳԻՄՕ–ի Միջազգային հետազոտությունների ինստիտուտի տնօրեն Անդրեյ Կազանցեւը։– Ռուսաստանում ԱՊՀ այս կամ այն երկրի վարկանիշը կախված է սփյուռքի մեծությունից։ Նրա կարծիքով վարկանիշների վրա ազդում է նաեւ այն, թե ինչպես է նրանց կյանքը լուսաբանվում Ռուսաստանում, որքանով ռուսաստանցիները լավ պատկերացում ունեն այն մասին, թե ինչ է կատարվում։
ՎԻՑՕՄ–ի մասնագետները նաեւ նշում են, որ ռուսաստանցիները Բելառուսին (64 տոկոս) ու Ղազախստանին (57 տոկոս) են համարում իրենց երկրի գլխավոր գործընկերը միջազգային ասպարեզում։ Պատասխանելով հարցին, թե որ երկիրն է Ռուսաստանի ամենահուսալի գործընկերը Բելառուսից ու Ղազախստանից հետո՝ ՌԴ քաղաքացիները նշել են Հայաստանը՝ 16 տոկոս, Ադրբեջանը՝ 10 տոկոս, Ղրղզստանը՝ 8 տոկոս եւ Ուզբեկստանը՝ 8 տոկոս։ Վրաստանը, Տաջիկստանը, Մոլդովան, Թուրքմենստանը եւ Ուկրաինան ստացել են համապատասխանաբար 6, 5, 5, 5 եւ 1 տոկոս։
Ռուսախոս բնակչության իրավունքների պաշտպանության տեսակետից Բելառուսին նշել է հարցվածների 66 տոկոսը, Ղազախստանին՝ 38 տոկոսը, Հայաստանին՝ 11 տոկոսը, Ադրբեջանին՝ 6 տոկոսը, Վրաստանին ու Մոլդովային՝ 6 տոկոսը, Ուկրաինային՝ 5 տոկոսը։
Հարցումն իրականացվել է 1.2 հազար մարդու շրջանում։