Այն որ սոցիալական լարված վիճակում գտնվող ընտանիքներ կան, բոլորին է հայտնի: Այս մասին այսօր՝ դեկտեմբերի 5-ին, Ազգային ժողովում լրագրողների հետ զրույցում նշել է Ազգային ժողովի պատգամավոր, ՀՀԿ խմբակցության անդամ Խոսրով Հարությունյանը։

«Թանկացումները լավ բան չեն։ Որեւէ սպառողին, նույնիսկ ամենահիմնավորված թանկացումները չեն կարող բավարարել»,-ասաց նա ու հավելեց. «Այն, որ սոցիալապես լարված վիճակում գտնվող ընտանիքներ կան, բոլորին է հայտնի։ Իշխանության քայլերն են հասկանալ, որ կան գործոններ, որոնք ազդում են գնի վրա եւ պայմանավորված են քաղաքականությամբ եւ կան գործոններ, որոնք ազդում են գնի վրա եւ դա պայմանավորված չէ մեզնով»։

Պատգամավորը հստակեցրեց, որ այն դեպքում, երբ գների ավելացումը պայմանավորված է դրսի գործոններով, այդ պարագայում Հայաստանի իշխանություններն անելիք չունեն. «Բոլորը գիտեն, որ նորզելանդական կարագը միջազգային շուկայում թանկացել է։ Ինչու է թանկացել, չեմ կարող ասել, հետեւաբար կարագի թանկացումը պայմանավորված չէ Հայաստանի ներքին քաղաքականությամբ»։

Լրագրողի դիտարկմանը, թե Եվրասիական տնտեսական միության Մաքսային օրենսգիրքի մասին պայմանագիրը վավերացնելու մասին ՀՀ օրենքի նախագծի ընդունմամբ հունվարից մեծ թվով ապրանքներ թանկանալու են, Հարությունյանը չհամաձայնեց. «Մաքսային օրենսգիրքը որեւէ կապ չունի դրույքաչափերի հետ, եւ այդ փաստաթուղթը ընդամենը մաքսային ընթացակարգերը պարզեցնում է հօգուտ տնտեսվարողների։ Դա պետք է անպայման ընդունել»։

Անդրադառնալով սահմանի վրա երրորդ երկրներից մաքսային դրույքաչափերի ավելացմանը, պատգամավորը նկատեց. «Բոլոր այն երկրները, որոնք ԵՏՄ-ում ունեն սեփական արտադրությունը, ապա այդ դրույքաչափերի բարձրացումը չի բերելու այդ ապրանքների թանկացման, որովհետեւ դա միտված է պաշտպանելու ներքին արտադրողին։ Մենք ԵՏՄ-ի տարածքում կունենանք սեփական արտադրության ապրանքներ։ Այն ապրանքները, որոնք չունեն սեփական արտադրող, դրանց դրույքաչափերը սահմանի վրա չեն ավելացվելու։ Հետեւաբար այն զրույցները, որ մաքսային սահմանի վրա դրույքաչափերը բերելու են ապրանքների համատարած գների բարձրացման, չի համապատասխանում ոչ իրականությանը, ոչ էլ տրամաբանությանը»։