Ճապոնական Nissan Motor ընկերությունը երեքշաբթի Յոկոհամայում ներկայացրել է շարժական միջոցների ավտոմատ կառավարման համար նախատեսված Easy Ride նախագիծը, որի ճանապարհային փորձարկումները կանցկացվեն 2018 թվականին: Այս մասին հայտնել է ընկերության մամուլի ծառայությունը, փոխանցում է «ՌԻԱ Նովոստի»-ն։
Ըստ Nissan Motor ընկերության՝ Easy Ride համակարգով հագեցված ավտոմեքենաների թեստ-դրայվը տեղի կունենա 2018 թվականի մարտի 5-18-ը: Այս համակարգը թույլ կտա ավտոմեքենային տեղաշարժվել նավիգատորի օգնությամբ առանց վարորդի եւ ապահովել երթեւեկության անվտանգությունը:
Նախագիծը մշակվել է Տոկիոյում տեղակայված DeNA (Դի-Էն-Էյ) էլեկտրոնային ընկերության հետ համատեղ: Easy Ride համակարգի մշակումը իրականացվում է Nissan Motor-ի եւ DeNA-ի կողմից՝ հունվարի 2017 թվականից ի վեր, Տոկիոյոմ 2020-ին կայանալիք օլիմպիական խաղերին ընդառաջ մրցակիցների կողմից ինքնակառավարվող ավտոմեքենաների ստեղծման ուղղությամբ ջանքերի ֆոնին:
Յոկոհամայում գտնվող Nissan Motor ընկերությունը արտադրում է Nissan, INFINITI եւ Datsun ապրանքանիշերի մոտ 60 ավտոմոբիլային մոդել: 2016 թվականին ընկերությունը ամբողջ աշխարհում վաճառել է 5.63 մլն ավտոմեքենա: Իսկ 1999 թվականին հիմնադրված DeNA ընկերությունը զբաղվում է վիրտուալ խաղերի մշակմամբ:
Անցյալ տարի Honda Motor ավտոմոբիլային ընկերությունը եւս հայտարարել էր ինքնակառավարվող ավտոմեքենաների կոմերցիոն արտադրության պլանների մասին:
Նախատեսվում է, որ ընկերության ավտոմեքենաները հագեցված կլինեն տեսախցիկներով, ռադարներով եւ արբանյակային նավիգացիոն համակարգերով: Վաճառքի կհանվեն այն մեքենաները, որոնք կկարողանան առանց վարորդի ճանապարհներին պահպանել շարքային կարգը եւ անհրաժեշտ հեռավորությունը, ինչպես նաեւ դուրս գալ վճարովի ճանապարհների վրա եւ հակառակը: Նշենք, որ նմանատիպ նախագիծ ունի նաեւ Toyota ընկերությունը:
