Յուրաքանչյուր նախարար ունի իր խաղի կանոնները: ՀՀԿ խմբակցության ղեկավար Վահրամ Բաղդասարյանը NEWS.an-ի հետ զրույցում այսպես մեկնաբանեց ՊՆ գլխավոր շտաբի պետի տեղակալ, բանակի հնաբնակ Հայկազ Բաղմանյանի պաշտոնանկությունը:
Նշենք, որ Հայկազ Բաղմանյանի պաշտոնանկությունը նախարար Վիգեն Սարգսյանը պայմանավորել է աշխատանքային թերացումներով: Բաղմանյանի թերացումների եւ ահռելի ունեցվածքի աղբյուրների մասին լրատվամիջոցները բազմիցս են անդրադարձել, սակայն ՊՆ ղեկավարությունը այն անտեսել է:
Մեր հարցին՝ ինչու այսօր իշխանությունը աչքերը բացեց Բաղմանյանի թերացումների վրա եւ դրանք աղաղակելով պաշտոնանկ արեց, Բաղդասարյանը պատասխանեց. «Սեյրան Օհանյանը իր ղեկավարման օրոք կարող է այդ թերացումը թերացում չի համարել: Մի նախարարի հայացքով այն կարող է թերացում է, մյուսի հայացքով՝ ոչ»:
Հանրապետական կուսակցության ներկայացուցիչը նշեց, թե Բաղմանյանի ուժերը համապատասխան տեղերում կօգտագործեն, իսկ տեղի ունեցող գործընթացները որակի սերնդափոխության հանատեքստում են:
Ավելի վաղ NEWS.am-ը հայտնել էր, որ Հայկազ Բաղմանյանը զորացրվելու վերաբերյալ զեկուցագիր է ներկայացրել պաշտպանության նախարար Վիգեն Սարգսյանի հորդորով: Հարցին, թե ինչով է պայմանավորված, որ նման հորդորով դիմել է Բաղմանյանին, պաշտպանության նախարարը արձագանքելն էր. «Աշխատանքային պայմանավորվածությունների չկատարում, ծառայության անհամատեղելիություն»:
Նշենք, որ մամուլում լուրեր են շրջանառվում, որ Պաշտպանության նախարարությունը որոշում է կայացրել աշխատանքից ազատել ԶՈՒ գլխավոր շտաբի պետի տեղակալներ Հայկազ Բաղմանյանին եւ Ստեփան Գալստյանին: