Եթե դուք խոսում եք իշխանության ռեսուրսների մասին, ապա ասեք՝ ձեր ռեսուրսները որտեղից էին, որ կարողացաք այդքան ձայն ապահովել: Այս մասին, այսօր՝ դեկտեմբերի 6-ին, ԱԺ-ում 2018 թվականի պետական բյուջեի նախագծի քննարկման ժամանակ նշել է ՀՀԿ խմբակցության ղեկավար Վահրամ Բաղդասարյանը՝ անդրադառնալով «Ելք» խմբակցության ղեկավար Նիկոլ Փաշինյանի այն հայտարարությանը, թե ՀՀԿ-ն իր ձայների մեծամասնությունն ընտրակաշառք բաժանելով է ստացել, հետեւաբար շահագրգռված չէ, որ հասարակությունը լավ ապրի եւ 10 հազար դրամ ընտրակաշառքին չնայի:
«Ելույթների մեծ մասում անդրադարձ էր կատարվում ընտրություններին: Այս ելույթները պետք է լինեին կամ նախընտրական, կամ հետընտրական շրջանում: Եթե հիշում եք, շատ մեծ գոհունակություն էին հայտնում այն ուժերը, որոնք այդ արգելքը հաղթահարել էին եւ եկել ԱԺ, ընտրությունների ժամանակ որեւէ ուժի հանձնաժողովի անդամի կողմից չի եղել դիտարկում, որեւէ ցույցեր չեն եղել, ընդամենը մեկ դիմում է ներկայացվել Սահմանադրական դատարան՝ ՀԱԿ խմբակցության կողմից, այսինքն՝ բոլորը գոհ էին, իսկ ինչ վերաբերում է ընտրակաշառքներին, ես խնդրում եմ՝ բոլորդ մոնիտորինգ արեք, թե ում ռեսուրսներն ինչքան էին, եւ որտեղից էին դրանք, եթե դուք խոսում եք իշխանության ռեսուրսների մասին, ապա ասեք՝ ձեր ռեսուրսները որտեղից էին, որ կարողացաք այդքան ձայն ապահովել»,-ասաց նա:
Վահրամ Բաղդասարյանն անդրադարձավ նաեւ «Ծառուկյան» խմբակցության անդամ Նաիրա Զոհրաբյանի հայտարարությանը, թե ներդրումները միայն գույնզգույն փուչիկներ են, իրական ներդրումներ չկան. Նա մասնավորապես, ասաց. «Ներդրումների հետ կապված՝ ինձ թվում է, որ որեւէ բան չի խանգարում մեր երկրի զարգացման համար, որեւէ աթոռ ու պաշտոն չի խանգարում, եթե որեւէ քաղաքական ուժ ցանկանում է մասնակցություն ունենալ մեր երկրի զարգացմանը, կարող են 15 մլրդ ներդրում կատարել, եւ իշխանությունը պարտավորվում է, որ այդ վերահսկողությունը ստանձնեն ընդդիմադիրները, եւ վերահսկողություն ստանձնեն նրանք»:
