BMW ընկերությունը ներկայացրել է մինչեւ 2025 թվականը միացվող հիբրիդների եւ էլեկտրամոբիլների մակնիշների հավաքածուի զարգացման ծրագիր: Ամենազարգացած մոդելներից մեկը կլինի ընդհանուր 800 ձիաուժ հզորությամբ 3 էլեկտրաշարժիչներով «լիցքավորվող» տարբերակը: Ընթացքի հեռավորությունը կկազմի մոտ 700 կմ, փոխանցում է Motor-ը:
Արտադրողը 25 նոր մոդել կթողարկի, այդ թվում՝ ամբողջությամբ էլեկտրական ուժային սարքերով 12 մեքենա: Այս ծրագրի առաջին մեքենան վերջերս ներկայացված i8 Roadster սպորտհիբրիդն է:
2019-ին կհայտնվի առավել զարգացած էլեկտրական տեխնոլոգիաներով առաջին մոդելը, որը կունենա լիցքը պահելու ավելի բարձր խտությամբ մարտկոցներ եւ կատարելագործված էլեկտրաշարժիչներ: Դա կլինի ամբողջությամբ էլեկտրական MINI-ն: Մեկ տարի հետո ընկերությունը կթողարկի X3 էլեկտրական քրոսովերը, իսկ 2021-ին՝ անվարորդ iNext-ը:
BMW-ի էլեկտրամոբիլների հիմքում կդրվի HEAT-ի (High-integrated Electric Drivetrain) ճարտարապետությունը, որը նախատեսում է էլեկտրաշարժիչի, փոխանցումների միացման տուփի եւ էլեկտրոնային բաղադրիչների միավորում միասնական ալյումինե բլոկում:
Այսպիսի համակարգը կսնուցվի 60, 90 եւ 120 կՎտ/ժ տարողությամբ մարտկոցների բլոկից: Այսպիսի մարտկոցներով մեքենայի ընթացքի պաշարը կկազմի համապատասխանաբար մոտ 450, 550 եւ 700 կմ:
