Եվրոպայի խորհրդի նախարարների կոմիտեն, որի կազմում ներառված են 47 պետություններ, Ադրբեջանի դեմ սկսել է խախտումների վերաբերյալ գործընթաց՝ կապված ընդդիմադիր գործիչ Իլքար Մամեդովին առանց նախապայմանների ազատ արձակելու մասին Մարդու իրավունքների եվրոպական դատարանի որոշումից շարունակաբար հրաժարվելու հետ։
Նախարարների կոմիտեն, առաջին անգամ կիրառելով 2010 թվականին ընդունված այս ընթացակարգը, պաշտոնապես դիմել է ՄԻԵԴ` խնդրելով որոշել, թե արդյոք Ադրբեջանը հրաժարվում է այս գործով դատարանի վճիռը կատարելու իր պարտականությունից:
Դատարանը 2014 թ. մայիսին եզրակացրել է, որ ներքին դատարաններում փաստեր եւ վկայություններ չկան, որոնք կհիմնավորեին Մամեդովին առաջադրված մեղադրանքը, նրա ձերբակալումը կամ նախնական կալանքը: Դատարանը գտել է, որ այդ միջոցառումների իրական նպատակն է եղել լռեցնել կամ պատժել նրան կառավարությանը քննադատելու համար:
Դատարանի վճիռն արձանագրել է մարդու իրավունքների եվրոպական կոնվենցիայի 5-րդ, 6-րդ եւ 18-րդ հոդվածների խախտում։ Մինչեւ 2017 թվականը դատարանը կոնվենցիայի 18-րդ հոդվածի խախտում արձանագրել է միայն 5 գործով, եւ բոլոր այդ դեպքերում, բացի Իլքար Մամեդովն ընդդեմ Ադրբեջանի գործից, մեղադրյալները ազատ են արձակվել։
2014 թ․ դեկտեմբերից կոմիտեն ընդունել է մի շարք որոշումներ եւ միջանկյալ բանաձեւեր, որտեղ ընդգծվում էր 2014 թ․ մայիսի 22-ի ՄԻԵԴ վճռի մեջ նշված քրեական դատավարության էական խախտումները եւ կոչ էր արվում անմիջականորեն եւ անվերապահորեն ազատ արձակել Ի.Մամեդովին:
Սակայն, դատարանի վերջնական վճռից ավելի քան երեք տարի անց էլ մեղադրյալը դեռեւս գտնվում է անազատության մեջ քրեական դատավարության խախտումների պատճառով։