«Հայաստանի եվրոպացի բարեկամներ» («EuFoA») միջազգային հասարակական կազմակերպության բրյուսելյան գրասենյակում դեկտեմբերի 5-ին կազմակերպվել է բացառիկ ճեպազրույց ՀՀ ԱԺ արտաքին հարաբերությունների մշտական հանձնաժողովի նախագահ, «Եվրանեսթ» խորհրդարանական վեհաժողովի հայաստանյան պատվիրակության ղեկավար եւ ԵՄ-Հայաստան խորհրդարանական համագործակցության հանձնաժողովի համանախագահ Արմեն Աշոտյանի հետ՝ նվիրված Հայաստան-ԵՄ հարաբերությունների քննարկմանը:
Արեւելյան գործընկերության 5-րդ գագաթնաժողովին եւ Հայաստանի ու Եվրոպական Միության միջեւ Համապարփակ եւ ընդլայնված գործընկերության համաձայնագրի (ՀԸԳՀ) ստորագրմանն անմիջապես հաջորդող այս միջոցառումը համակարգվում էր «EuFoA»-ի տնօրեն Դիոգո Պինտոյի կողմից: Միջոցառմանը ներկա էին ավելի քան 30 լրագրողներ, դիվանագետներ, ԵՄ կառույցների, միջազգային հասարակական կազմակերպությունների, ինչպես նաեւ տարբեր հետազոտական կենտրոնների ներկայացուցիչներ:
Իր ներածական խոսքում Աշոտյանը նշեց, որ ՀՀ-ԵՄ համաձայնագիրը նոյեմբերի 24-ին Բրյուսելում անցկացված Արեւելյան գործընկերության գագաթնաժողովի ամենաշոշափելի հաջողությունն է եւ հիշեցրեց լսարանին՝ սա առաջին համաձայնագիրն է, որը ստորագրվում է ԵՄ-ի եւ ԵՏՄ անդամ երկրի միջեւ: Համաձայնագրի տնտեսական ու առեւտրային հատվածները համապատասխանեցված են Հայաստանի՝ որպես այլ ընդհանուր շուկայի անդամ պետության պարտավորություններին ու սահմանափակումներին եւ չեն նախատեսում Հայաստանի եւ ԵՄ-ի միջեւ ազատ առեւտրի գոտու ստեղծում: Մյուս կողմից, ՀԸԳՀ-ի քաղաքական մասի հիմնադրույթները առավելագույնս համարժեք են ասոցացման այն համաձայնագրերին, որոնք ԵՄ-ն ստորագրել է Վրաստանի, Մոլդովայի կամ Ուկրաինայի հետ:
Արմեն Աշոտյանի կարծիքով, համաձայնագիրն ամբողջովին համապատասխանում է Հայաստանի՝ ԵՄ-ի հանդեպ ունեցած կարեւորագույն ակնկալիքներին, մասնավորապես, դրանով նախատեսվում է ԵՄ-ի կողմից ոչ միայն ֆինանսական աջակցության տրամադրում Հայաստանում անցկացվող բարեփոխումներին, որոնք միտված են հայ հասարակության հետագա ժողովրդավարացմանը, օրենքի գերակայության ամրապնդմանը եւ մարդու իրավունքների ու քաղաքացիական ազատությունների պաշտպանությանը:
Եզրափակելով իր ելույթը՝ Աշոտյանը հույս հայտնեց, որ ՀՀ-ԵՄ համաձայնագիրը կվավերացվի հնարավորինս շուտ ՝ մինչեւ 2019 թ. Եվրոպական Խորհրդարանի ընտրությունները, ինչը կնպաստի վիզայի ազատականացման վերաբերյալ բանակցությունների շուտափույթ մեկնարկին: Դրանք դրական ազդակներ կլինեն եւ արագ ու շոշափելի արդյունքներ կարձանագրեն Հայաստանի քաղաքացիների համար:
Ճեպազրույցին հաջորդած քննարկման ընթացքում հնչեցին համաձայնագրի ուժի մեջ մտնելու վերաբերյալ հարցեր: Համաձայնագրի ամբողջական իրագործման համար անհրաժեշտ են ԵՄ անդամ 28 պետությունների խորհրդարանների եւ ԵԽ վավերացումները, իսկ Հայաստանն, իր հերթին, պետք է շարունակի բարեփոխումների իրագործումը՝ ԵՄ չափորոշիչներին համապատասխանեցնելով իր ինստիտուցիոնալ եւ իրավական համակարգը:
Եզրափակելով միջոցառումը՝ «EuFoA»-ի տնօրեն Դիոգո Պինտոն իր երախտագիտությունը հայտնեց խոսնակին եւ մասնակիցներին, ովքեր նպաստում են, որ «EuFoA»-ն իրագործի Հայաստանի եւ ԵՄ-ի միջեւ կամուրջներ կառուցելու իր նպատակը. «2018 թ.-ին, ինչպես այս եւ նախորդ տարիներին, «EuFoA»-ն կշարունակի իր առաքելությունը՝ հանդես գալով որպես Հայաստանի եւ Եվրոպայի համապատասխան քաղաքական դերակատարների միջեւ երկխոսության հարթակ: Հրավիրում ենք բոլորիդ մասնակցելու մեր միջոցառումներին»,-նշեց նա: