Էներգետիկայի նախարարությունը լիազորված չէ պարզել, թե ինչու են «Նաիրիտ»-ի ակտիվները վաճառվում ցածր գներով։ Այս մասին դեկտեմբերի 6-ին Ազգային ժողովում հայտարարեց Էներգետիկ ենթակառուցվածքների եւ բնական պաշարների նախարար Աշոտ Մանուկյանը՝ պատասխանելով «Ծառուկյան» ընդդիմադիր խմբակցության պատգամավոր Վահե Էնֆիաջյանի հարցին։

Պատգամավորը, մասնավորապես, հետաքրքրվել է, թե ինչու է  «Նաիրիտ» քիմիական գործարանի պոլիկլինիկայի երեքհարկանի շենքի 1,5 հազար ք․կմ տարածքը 2,5 հազար ք․կմ հարակից տարածքով վաճառվում  70 միլիոն դրամով, որը համարժեք է մեկ բնակարանի գնի, իսկ քացախաթթվի արտադրության տարածքը, որի շուկայական գինը այսօր կազմում է 50-60 միլիոն դոլար, վաճառքի է հանվել ընդամենը 1,5 միլիոն դոլարով:

Նախարարի խոսքով՝ «Նաիրիտ»-ի աշխատակիցներին դեռ չեն ներկայացրել գործարանի առողջացման ծրագիր, այն դեպքում, երբ նրանք պետք է դա անեին օգոստոսին կառավարության եւ «Եվրամիություն-Ասիա ֆինանսական կենտրոն» հոլդինգի միջեւ փոխըմբռնման հուշագիր ստորագրելուց հետո։

Նախարարի խոսքով՝ այս պահին ընթանում է «Նաիրիտ»-ի սնանկության գործընթացը, եւ գործարանի գույքը դրված է վաճառքի։