Լոնդոնի քաղաքապետ Սադիկ Հանի կարծիքով՝ ԱՄՆ նախագահ Դոնալդ Թրամփը, որը չորեքշաբթի հայտարարել էր Երուսաղեմը Իսրայելի մարաքաղաք ճնաչելու մասին եւ հրամայել էր ԱՄՆ դեսպանատունը Թել Ավիվից այնտեղ տեղափոխել, պետք է հրաժարվի Մեծ Բրիտանիա այցելելու մտքից, փոխանցում է «ՌԻԱ Նովոստի»-ն:
Քաղաքական գործչի խոսքով՝ Թրամփի որոշումը «լուրջ մտահոգություն է առաջացնում», քանի որ ԱՄՆ առաջնորդը «չի հասկանում այն վիրավորանքը, որ հասցնում է» արաբական աշխարհին: Լոնդոնի քաղաքապետն ընդգծել է, որ Երուսաղեմի կարգավիճակի հարցը պետք է լինի իսրայելցիների եւ պաղեստինցիների բանակցությունների օրակարգում:
«Այսպես է մտածում ամբողջ աշխարհը: Ֆրանսիան, Մեծ Բրիտանիան եւ այլ երկրներ այս քայլը դատապարտել են»,- հիշեցրել է Հանը: Նա միաժամանակ նշել է, որ Թրամփի որոշման դեմ բողոքը պետք է խաղաղ բնույթ կրի եւ մերձավորարեւելյան տարածաշրջանում բռնության բռնկում չհրահրի: «Ասում են, որ Միացյալ Նահանգներն ու Մեծ Բրիտանիան լավ բարեկամներ են: Այս պատճառով ասում եմ ԱՄՆ-ին՝ այո, դու, ինչպես նախկինում, իմ լավ բարեկամն ես, բայց դու պետք է Երուսաղեմի հարցում քո դիրքորոշումը փոխես»,- հավելել է Լոնդոնի քաղաքապետը:
