Օրենքում առաջարկվող փոփոխության իմաստն այն է, որ գործող նորմերով եթե տնտեսվարող սուբյեկտներից մեկը շուկայում 49 տոկոս է զբաղեցնում, իսկ մյուս տնտեսվարող սուբյեկտները 1 եւ 0,99 տոկոս ունեն, ապա առաջին երկուսը, որ համապատասխանաբար 49 եւ 1 տոկոս ունեն, կարող են համարվել գերիշխող դիրք ունեցող սուբյեկտներ: Այս մասին դեկտեմբերի 7-ին ԱԺ նիստում «Տնտեսական մրցակցության պաշտպանության մասին» օրենքում փոփոխությունների օրինագծի քննարկման ժամանակ ասաց օրինագծի հեղինակներից մեկը՝ «Ծառուկյան» դաշինքի խմբակցության քարտուղար Վահե Էնֆիաջյանը:
Նրա խոսքով՝ ակնհայտ է, որ տնտեսվարող սուբյեկտը, որը շուկայի 1 տոկոսն է զբաղեցնում, չի կարող համեմատվել 49 տոկոսը զբաղեցնող սուբյեկտի հետ եւ գերիշխող համարվել, չնայած օրենքում նշված է, որ եթե 2 տնտեսվարող սուբյեկտ զբաղեցնում են ամբողջ շուկայի 1/3-ը, իսկ 3 սուբյեկտը՝ համապատասխանաբար 2/3-ը, ապա ստացվում է, որ նրանք հավասարապես գերիշխող են: «Ակնհայտ է, որ շուկայում ընդամենը 1 տոկոս բաժին ունեցող ընկերությունը չի կարող համեմատվել 49 տոկոս ունեցող ընկերության հետ եւ գերիշխող համարվել»,- պարզաբանեց Էնֆիաջյանը:
