Երուսաղեմի մասին Դոնալդ Թրամփի հայտարարությունը չի նպաստում մերձավորարեւելյան խնդրի կարգավորմանը։ Այն առաջ է բերել պաղեստինցիների սուր արձագանքը եւ մեծապես բարդացրել է իրավիճակը տարածաշրջանում, հայտարարել է ՌԴ նախագահի մամուլի խոսնակ Դմիտրի Պեսկովը՝ հավելելով, որ ԱՄՆ նախագահի նման դիրքորոշումը պառակտում է միջազգային հանրությունը, քանի որ դրա հետ ոչ բոլորն են համամիտ, հայտնում է «ՌԻԱ Նովոստի»–ն։
«Իրոք մտահոգություն է առաջ բերում այն, թե ինչպիսի լարվածություն է առաջացել մերձավորարեւելյան խնդրի կարգավորման հարցում եւ տարածաշրջանում ԱՄՆ նախագահ պարոն Թրամփի հայտարարությունից հետո։ Մենք ենթադրում ենք, որ այդ որոշումն առնվազն չի նպաստում մերձավորարեւելյան խնդրի կարգավորման առաջընթացին, այլ ընդհակառակը, ինչպես մենք տեսնում ենք, առաջին հերթին պառակտում է միջազգային հանրությունը»,– ասել է Պեսկովը լրագրողին։
«Մենք գիտենք, որ բոլորը չեն համաձայն ԱՄՆ նախագահի այդ որոշման հետ։ Ավելին՝ դա Ռամալլահի կողմից բավականին սուր արձագանք է առաջ բերել։ Այդ պատճառով մենք պահպանում ենք մեր մտահոգությունը»,– ասել է Կրեմլի պաշտոնական ներկայացուցիչը։
«Ի՞նչ պետք է անել։ Շարունակել քաղաքական–դիվանագիտական ճանապարհներով լուծումներ փնտրել, թեպետ իրավիճակն, անխոս, մեծապես բարդացել է»,– հավելել է Պեսկովը։