Անկարայում սկսվել է Ժողովուրդների դեմոկրատական կուսակցության համանախագահ Սալահադդին Դեմիրթաշի նկատմամբ դատավարությունը, հայտնում է DW–ն։ Թուրքիայում խոշորագույն քրդամետ կուսակցության առաջնորդին կալանավորել էին 2016-ի նոյեմբերին եւ մեղադրել ահաբեկչության մեջ։
Թեպետ Դեմիրթաշը միջնորդել էր անձամբ Անկարայում դատարանի առջեւ կանգնելու համար, նրա դիմումը մերժվել էր։ Քաղաքական գործիչը նախկինի պես Էրդինի քննչական մեկուսարանում է գտնվում։ Կուսակցության մամուլի խոսնակ Այհան Բիլգենը հայտնել է, որ նրան առաջարկել էին տեսակապով մասնակցել դատական նիստին, սակայն Դեմիրթաշը հրաժարվել էր։
Դատախազը պատրաստվում է Դեմիրթաշի համար 142 տարվա ազատազրկում պահանջել։
Դեմիրթաշին մեղադրում են ահաբեկչական խմբավորում ստեղծելու եւ ղեկավարելու մեջ։ Դեմիրթաշի կողմնակիցները գտնում են, որ մեղադրանքը հիմնված է այն բանի վրա, որ քաղաքական գործիչը բացահայտ քննադատում էր Թուրքիայի կառավարությանը։
