Ֆրանսիայի Վիլերբան քաղաքում նոյեմբերի 21-ին Արցախի նախագահ Բակո Սահակյանի մասնակցությամբ հանդիսավոր միջոցառմամբ մեկնարկած «Ֆրանսիայում Արցախի օրեր» փառատոնը շարունակվում է:
Լեռնային Ղարաբաղի ԱԳՆ մամուլի ծառայությունից NEWS.am-ին հայտնեցին, որ այս օրերին փառատոնը հյուրընկալվել է Դրոմ դեպարտամենտի Վալանս եւ Բուր լե Վալանս քաղաքներին, որտեղ անցկացվող միջոցառումներին ներկայացվում են Արցախի մշակույթը եւ կենցաղը:
Դեկտեմբերի սկզբին Վալանսում տեղի է ունեցել հայազգի ֆրանսիացի ռեժիսոր Առնո Խայաջանյանի «Մենք ենք՝ մեր սարերը» վավերագրական ֆիլմի ցուցադրությունը: Տեղի է ունեցել նաեւ ֆրանսիացի լուսանկարիչ Իվան Տրավերի «Արցախ. երկրամասի հոգին» ցուցահանդեսի բացումը: Ցուցահանդեսը կընթանա 15 օր, որի ընթացքում այցելուներին կցուցադրվի նաեւ Գյուլե Քեշիշյանի «Արցախը՝ 180 վայրկյանում» անիմացիոն ֆիլմը: Ուշագրավ է, որ ցուցահանդես այցելությունը մտցվել է Վալանսի դպրոցական ծրագրի մեջ, ինչի շնորհիվ Վալանսի աշակերտները Արցախի հետ ծանոթանալու հնարավորություն ունեն:
Բուր լե Վալանս քաղաքի ամանորյա տոնավաճառում նաեւ արցախյան տաղավար է ներկայացվել, որտեղ ցուցադրվել են Արցախի մասին տեղեկատվությամբ բրոշյուրներ, տուրիստական ուղեցույցներ, ինչպես նաեւ Արցախում արտադրված իրեր: Տոնավաճառի բացման առիթով իր ելույթում Բուր լե Վալանսի քաղաքապետ Մարլեն Մուրիեն վերահաստատել է իր աջակցությունն Արցախին՝ մասնավորապես հայտարարելով, որ «2014-ին Շուշիի եւ Բուր լե Վալանսի Բարեկամության մասին հռչակագրի ստորագրման պահից կանգնած է Արցախի ժողովրդի կողքին»:
Դրոմ դեպարտամենտի խորհրդի շենքում մեկնարկել է ֆրանսիացի հայտնի նկարիչ Սիլվեն Սավոյայի «Ճանապարհորդություն դեպի Արցախ» գրաֆիկական նկարների 10-օրյա ցուցահանդեսը:
