Երեւանում այսօր՝ դեկտեմբերի 8-ին, անցկացվել է Մխիթարյան միաբանության Վենետիկի Սուրբ Ղազար կղզի մուտք գործելու 300 ամյակին նվիրված գիտաժողով:
Գիտաժողովը կազմակերպվել է «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի նախաձեռնությամբ: Լրագրողների հետ զրույցում ՊՈԱԿ-ի տնօրեն Արա Թարվերդյանը նշեց, որ նմանատիպ գիտաժողովներ իրենք կազմակերպում են տարբեր թեմաներով:
«Մխիթարյան միաբանության թողած գիտական ժառանգությունն անգնահատելի է: Մշակութային արժեքները համազգային են` անկախ նրանից, թե աշխարհի որ հատվածում են գտնվում, պետք է հանրահռչակել այն: Եվ մենք միաբանությունը դիտարկում ենք որպես պատմական արժեք եւ պարտավոր ենք պահպանել նրանց թողած գիտական ժառանգությունը»,-ասաց ՊՈԱԿ տնօրեն Արա Թարվերդյանը:
Գիտաժողովին զեկույցով հանդես եկավ նաեւ Վենետրիկի Մխիթարյան միաբանության Հայր Սերոբ վարդապետ Չամուռլյանը: Լրագրողների հետ զրույցում նա նշեց, որ նման միջոցառումները կարեւոր են նախ եւ առաջ նոր սերնդի մեջ ինքնագիտակցությունն ավելացնելու համար:
«Մենք սովորական փոքր ազգ չենք, այսօր կարող է՝ թվով փոքր ենք համարվում, բայց մենք հսկա ազգ ենք, դա պիտի գիտակցենք, զարգացնենք եւ գերազանցենք ինքներս մեզ: Շատ կարեւոր է հայապահպանությունը, սակայն ոչ թե մեկ հային վերցնես ու պահպանես թանգարանում, այլ ամբողջական հային վերականգնումն է եւ վերարտադրումը ժողովուրդների մեջ, որովհետեւ մենք որպես քաղաքակրթություն շատ բաներ ունենք բացահայտելու»,- ասաց Հայր Սերոբ վարդապետ Չամուռլյանը:
Նշենք, որ այսօր ժամը 15:30-ին էլ «Զվարթնոց» պատմամշակութային արգելոց թանգարանում կբացվի «Կղզյակ, որ մեզ ետուր արև» խորագիրը կրող ցուցահանդեսը: Կներկայացվի Վենետիկում Մխիթարյանների նախաձեռնությամբ տպագրված 15 անուն գիրք՝ «Հուշիկք», «Այրարատ», «Սիսական», «Աշխարհագրություն չորից մասանց աշխարհի» և այլն, Քյոթահիայի /Կուտինա/ հախճապակե իրեր:
Կցուցադրվի նաև մեծանուն գրող Ավետիք Իսահակյանի տուն թանգարանի հավաքածուից մի պատառիկ` Մխիթարյաների` Իսահակյանին նվիրած հուշամեդալը, Իսահակյանի երկու լուսանկար՝ Մխիթարյան հայրերի հետ Մխիթարյան միաբանությունում, Ղ.Ալիշանի մակագրությամբ իր լուսանկարը, որը նվիրել է Իսահակյանին: Գրականության և արվեստի թանգարանի հավաքածուից` Մխիթարյան միաբաններից Ղ.Ալիշանի ինքնագիրը, Արսեն Բագրատունու լուսանկարը (գրավյուրա) և օրագիրը (բնօրինակը): Միաբանության բազմաբեղուն գործունեության մասին կպատմեն նաև Երևանում գործող Մխիթարյան ճեմարանի տրամադրած լուսանկարները: