Կառավարությունում տեղի ունեցած խորհրդակցության ընթացքում վարչապետ Կարեն Կարապետյանին են ներկայացվել «Սեւան Ստարտափ Սամմիթ»-ի զարգացման հեռանկարներն ու հնարավորությունները:
Կառավարությունից NEWS.am-ին հայտնում են, որ նշվել է, որ «Սեւան Ստարտափ Սամմիթ 2017»-ը հյուրընկալել է շուրջ 4000 մասնակիցներ եւ հյուրեր աշխարհի 23 երկրներից: «Սեւան Ստարտափ Սամմիթ 2017»-ի ընթացքում փակված գործարքների գումարը գերազանցել է 200 հազար դոլարը, իսկ մրցանակային ֆոնդը գերազանցել է նախատեսված 40 հազարը եւ հասել 50 հազար դոլարի։
Սամմիթի ընթացքում ստարտափներով հանդես եկող թիմերը հնարավորություն են ունենում օրեր շարունակ շփվել, ծանոթանալ ինչպես միմյանց, այնպես էլ Հայաստանից եւ արտերկրից հրավիրված տարբեր ձեռնարկատերերի, մասնագետների եւ բանախոսների, բարձրակարգ ծրագրավորողների եւ ներդրողների հետ:
2018թ.-ին Սամմիթը նախատեսում է ընդլայնել իր աշխարհագրությունը եւ մի շարք միջոցառումներ անցկացնել աշխարհի տարբեր երկրներում՝ «Սիսայդ Ստարտափ Սամմիթ» անվանմամբ։
Վարչապետ Կարեն Կարապետյանը ողջունել է միջոցառման անցկացումը եւ ընդգծել, որ կառավարությունը պատրաստ է տարբեր հարցերում կազմակերպիչներին ցուցաբերել անհրաժեշտ օժանդակություն: