Գիտնականներն առաջին անգամ հստակ չափել են սեւ անցքի իրադարձությունների բուն հորիզոնում մագնիսական դաշտի ուժը եւ հայտնաբերել, որ այն անսպասելիորեն թույլ է եղել, ինչը կասկածի տակ է դնում դրանց «արտանետումների» բնույթի բոլոր բացատրությունները, գրում է Science ամսագիրը։
Գերծավալուն սեւ անցքերը գոյություն ունեն գրեթե բոլոր գալակտիկաների ներսում։ Ի տարբերություն սեւ անցքերի, որոնք առաջանում են աստղերի կոլապսից, դրանց զանգվածը մի քանի մլն անգամ գերազանցում է արեգակի զանգվածը։ Դրանք պարբերաբար կլանում են աստղեր, այլ երկնային մարմիններ եւ գազ ու կլանված մատերիայի մի մասը ջեթերի՝ տաքացած պլազմայի կույտերի տեսքով դուրս են նետում։
Գիտնականները դեռեւս չգիտեն, թե ինչպես են գոյանում այդ կույտերը։ Նրանք, Կարապի համաստեղությունում V404 միկրոքվազարի՝ գերծավալուն սեւ անցքի փոքր անալոգի ուսումնասիրության միջոցով պարզել են, որ տեսաբանների ընթացիկ պատկերացումները սեւ անցքերի մոտակայքում մագնիսական դաշտերի ուժի մասին արմատապես սխալ են։