Աթենքում բնակվող քրդերը դուրս են եկել փողոց՝ ի նշան բողոքի ընդդեմ Թուրքիայի նախագահ Ռեջեփ Էրդողանի դեկտեմբերի 7-ի այցի Աթենք:
Ցուցարարների պաստառները համեմատում են Էրդողանին Հիտլերի հետ: Նրան անվանում են «ահաբեկիչ» եւ «ֆաշիստ»:
Ցուցարարների շարքում են Աթենքում Քուրդիստանի մշակութային կենտրոնի անդամները, որոնց ձեռքին եղել են փաստառներ՝ «Ազատություն Օջալանին», «Էրդողան՝ բռնապետ»: Նրանք անցել են քաղաքի փողոցներով, իսկ Պրոպիլեա փողոցում այրել են Էրդողանի նկարով պաստառը:
«Մենք չենք ընդունում դիկտատոր Էրդողանի այցը Հունաստան: Էրդողանն ու իր կուսակցությունը սպանել են Թուրքիան, Մերձավոր Արեւելքը եւ հատկապես քուրդ ժողովրդին: Նա այն մարդն է, որ երկար տարիներ զանգվածային սպանություններ է իրականացնում Քուրդիստանում: Նրա այցը Հունաստան անընդունելի է»,-ասված է Քուրդիստանի մշակութային կենտրոնի հայտարարությունում:
Ցույցին մասնակցել է նաեւ Ժողովրդական միասնություն կուսակցության քարտուղար Պանայոտիս Լաֆազանիսը, ով նշել է. «Մենք դատապարտում ենք Էրդողանի ներկայությունը Հունաստանում: Էրդողանը քրդերի մեծ կոտորածների կազմակերպիչն է: Հենց Թուրքիայում իշխող ռեժիմն է, որ ահաբեկչական հետապնդում է սկսել Թուրքիայի ժողովրդավարների եւ ապստամբների դեմ:
Էրդողանի գլխավորությամբ ռմբակոծվել ու ավերվել են այնպիսի քաղաքներ, ինչպիսիք են Սուրը, Սուսայբինը, Իդիլը, Շըրնաքը, Հաքքարին»:
Քրդերի բողոքի ակցիայի ընթացքում միջադեպեր չեն արձանագրվել, ոստիկանությունը չի միջամտել, Էրդողանի թիկնապահները ցուցարարների վրա չեն հարձակվել:
Թուրքիայի նախագահը երկօրյա այցով ժամանել է Հունաստան: Վերջին 65 տարիների ընթացքում սա Թուրքիայի ղեկավարի առաջին այցն է Հունաստան: Այցի նպատակն է բարելավել թուրք-հունական հարաբերությունները:
Երկու երկրներն էլ հանդիսանում են ՆԱՏՕ-ի անդամներ, սակայն նրանց միջեւ առկա են բազմաթիվ խնդիրներ, ներառյալ Կիպրոսի հիմնախնդիրն ու սահմանային այլ հարցեր: Նախքան իր այցը նախագահ Էրդողանը հունական լրատվամիջոցների հետ զրույցում նշել էր, որ թուրք-հունական սահմանների վերաբերյալ 1923 թվականի Լոզանի պայմանագիրը պետք է վերանայվի, որը, Էրդողանի կարծիքով, ունի դրույթներ, որոնք պարզաբանման կարիք ունեն: Նա նաեւ ընդգծել է, որ Հունաստանը չէր կարող դառնալ ՆԱՏՕ-ի անդամ առանց Թուրքիայի աջակցության:
Դրան արագորեն արձագանքել է Հունաստանի նախագահ Պրոկոպուս Պավլոպոլուսը, ով հայտարարել է, որ պայմանագիրը բանակցության ենթակա չէ:
Վերլուծաբանները չեն ակնկալում, որ այս այցը կարող է անմիջապես բարելավել այս երկրների միջեւ հարաբերությունները: Այցին նախորդել էին Կիպրոսի հիմնախնդրի առնչությամբ տապալված հուլիսյան բանակցությունները, որոնք կրկին լարվածություն էին առաջացրել թուրք-հունական հարաբերություններում:
Երկու երկրներն էլ ժամանակ առ ժամանակ օգտագործում են միմյանց նկատմամբ ռազմատենչ հռետորաբանություն: Հունաստանում շատերը գտնում են, որ Թուրքիան տարածքային պահանջներ ունի Հունաստանի նկատմամբ: Թուրքիայի նախագահն էլ իր հերթին հայտարարել է, որ հույները կարող են վստահ լինել, որ թուրք-հունական բացասական հարաբերությունները անցել են պատմության գիրկը: Նա այցը բնութագրել է որպես պատմական:
Էրդողցանը հանդիպել է նաեւ Հունաստանի վարչապետ Ալեքսիս Ցիպրասին: Վերջինս ընդգծել է, որ կարեւոր է քննարկել տարաձայնությունները կառուցողական մթնոլորտում եւ խուսափել սադրանքներից: Նա նաեւ հաղորդել է, որ կողմերը համաձայնվել են միջոցներ ձեռնարկել փոխվստահության մեծացման ուղղությամբ:
Այցի ընթացքում անվտանգության մարմինները արտակարգ միջոցներ են ձեռնարկել: Աթենքի որոշ հատվածներ փակվել են բնակիչների եւ հակաէրդողանական ցուցարարների համար: