Լեռնային Ղարաբաղի հարցով երկխոսությունը դեռեւս լուրջ առաջընթաց չունի: Այս մասին Վիեննայում տեղի ունեցած մամուլի ասուլիս ժամանակ ասել է ՌԴ ԱԳ նախարար Սերգեյ Լավրովը:
Ի պատասխան հարցին՝ «ԵԱՀԿ ԱԳ նախարարների խորհրդի նիստին Եվրոպայում տարբեր հակամարտությունների նկատմամբ ոչ միատեսակ վերաբերմունք է նկատվում: Սա հատկապես տագնապով է ընկալվում Ադրբեջանում՝ հաշվի առնելով Լեռնային Ղարաբաղի հակամարտոթյան առկայությունը: Վիեննայում ԵԱՀԿ Խորհրդարանական վեհաժողովի վերջերս տեղի ունեցած նիստում այսպիսի մոտեցում չի եղել: Չարժի՞ նույնքան օբյեկտիվ գործել նաեւ ԱԳ նախարարների խորհրդում», Սերգեյ Լավրովը նշել է, որ այս կամ այն ճգնաժամի կարգավորման նկատմամբ վերաբերմունքը մշտապես համադրում է 2 մոտեցում. «Դա որոշակի բազային սկզբունքներն են եւ կողմերի միջեւ ուղղակի շփումները, շահերի հավասարակշռման որոնումը, տարբեր փուլերում ձեռք բերված համաձայնությունների կատարումը, որպեսզի հետո հետ չնահանջենք: Մեր գործընկերների հետ Ռուսաստանի Դաշնությունը արդեն երկար տարիներ (նվազագույնը 7 տարի) առաջարկել է ԵԱՀԿ-ում փաստաթուղթ ընդունել, որում կթվարկվեին այն սկզբունքները, որոնք, ինչպես դուք ասացիք, բոլոր հակամարտությունների «միատեսակ» մոտեցման հիմքն են: Իհարկե, արեւմտյան գործընկերներն ասացին, որ դա պիտանի չէ, որ յուրաքանչյուր ճգնաժամ իր յուրահատկություններն ունի: Դա այդպես է: Այս պատճառով, բացի ընդհանուր չափանիշներից, որոնցով այս կամ այն հակամարտությունը կարգավորելիս պետք է առաջնորդվեն միջնորդները, անհրաժեշտ է հաշվի առնել նաեւ դրանցից յուրաքանչյուրի յուրահատկությունը: Օրինակ՝ Մերձդնեստրում գործընթաց է ընթանում, որը մեծ մասամբ կապված է ոչ թե բռնության դադարեցման հետ (այնտեղ գործնականում ոչ մի բռնություն չկա ռուս խաղաղապահների ներկայության շնորհիվ), այլ ամենօրյա կյանքի կարգավորման հետ: Ուկրաինայում հիմա առաջին հերթին անհրաժեշտ է դադարեցնել հրադադարի խախտումները, որոնց մասին պարբերաբար հայտարարվում է: ԵԱՀԿ-ը զեկուցում է, որ արդեն 7 օր է ոչ մեկը չի կրակում, կարելի է հետ քաշել ծանր տեխնիկան: Կիեւի իշխանություններն ասում են, որ սա ԵԱՀԿ վիճակագրությունն է, եւ ուկրաինական վիճակագրությամբ՝ մի քանի կրակոցներ եղել են: Ես ես բառացի եմ ասում, ինչին հիմա հանգել է Լուգանսկի կայարանի շրջանում ուժերի տարածման խնդիրը, ինչի մասին «նորմանդական ձեւաչափի» առաջնորդները Բեռլինում պայմանավորվել էին դեռեւս անցյալ տարվա հոկտեմբերին»:
«Իհարկե, յուրաքանչյուր հակամարտության դեպքում պետք է հասկանալ, որ տվյալ պահը չէ առաջնահերթ: Սակայն նաեւ անհրաժեշտ է հենվել որոշակի ընդհանուր, ինչպես դուք ասացիք, «միատեսակ» մոտեցումների վրա: Դրանց թվում է առաջին հերթին՝ հակամարտության կողմերի միջեւ ուղիղ երկխոսությունը, որն առկա է Լեռնային Ղարաբաղի հակամարտության դեպքում: Ցավոք, այն դեռեւս լուրջ առաջընթաց չունի, սակայն այն փաստը, որ այս տարի երկխոսություն տեղի ունեցավ նախագահների մակարդակով եւ մի քանի անգամ ԱԳ նախարարների մակարդակով մեզ դրական է թվում: Կշարունակենք աշխատել այն ուղղությամբ, որով ընթանում է Ռուսաստանի, ԱՄՆ եւ Ֆրանսիայի համանախագահների հավաքական մոտեցումը: Այս նստաշրջանում մենք այն վերահաստատեցինք: Այն պարունակում է կարգավորման սկզբունքները, որոնք կողմերն ընդունել են, սակայն դեռեւս չեն փոխանցել գործնական քայլերի լեզվին: Սա հեշտ գործ չէ, բայց մենք շարունակում ենք դրանով զբաղվել»,- հայտարարեց Սերգեյ Լավրովը: