2018 թվականի պետբյուջեն ընդունվեց: Ազգային ժողովում այսօր նախագծին կողմ է քվեարկել 64, դեմ՝ 35 պատգամավոր: Բյուջե-2018-ին դեմ են արտահայտվել «Ծառուկյան» եւ «Ելք» խմբակցությունները:
Ձայների 73 կողմ, 12 դեմ եւ 6 ձեռնպահ հարաբերակցությամբ խորհրդարանն առաջին ընթերցմամբ ընդունեց նաեւ Ընտանեկան բռնության մասին աղմկահարույց օրինագիծը: Ազգային ժողովի աշնանային նստաշրջանի հերթական քառօրյան ավարտվեց, սակայն դեկտեմբերի 12-ին պատգամավորները նորից կհավաքվեն՝ արտահերթ նիստի: Այն նախաձեռնել է կառավարությունը՝ 19 հարցից կազմված օրակարգով:
Քաղտեխնոլոգ Կարեն Քոչարյանը ֆեյսբուքյան գրառմամբ ակցիա է սկսել՝ պահանջելով, որ Հանրապետական խմբակցության անդամ Հակոբ Հակոբյանը վայր դնի պատգամավորական մանդատը: Քոչարյանն այսպես է արձագանքել աղքատության մասին Հակոբյանի աղմկահարույց հայտարարություններին՝ նշելով, որ, իր խոսքով, «ոչ ադեկվատ մարդիկ, որոնք հոգեբույժի կարիք ունեն, իրավունք չունեն ձեւավորել մեր օրենսդրական դաշտը»: Իսկ Հակոբ Հակոբյանն օրերս լրատվամիջոցներից մեկին տված հարցազրույցում հայտարարել էր, թե թանկացումները չեն վնասի աղքատներին, որովհետեւ նրանք, միեւնույն է, գումար չունեն եւ առանձնապես շատ բան չեն կարողանում գնել:
Լրագրողները փորձել են Հակոբ Հակոբյանից մեկնաբանություն ստանալ մանդատը վայր դնելու պահանջի մասին: Պատգամավորն արձագանքել է՝ «գնացեք դուք էլ միացեք այդ ակցիային» ու դուռը շրխկացրել լրագրողների դեմքին: Իսկ ինչպես են երեւանցիներն արձագանքում թանկացումներին, փորձել ենք պարզել հարցման միջոցով:
Երուսաղեմն Իսրայելի մայրաքաղաք ճանաչելու՝ ԱՄՆ նախագահի որոշման դեմ բողոքի ցույցերը շարունակվում են: Քաղաքում լարվածությունը պահպանվում է, իշխանությունները ոստիկանական նոր ուժեր են կենտրոնացրել Երուսաղեմում՝ հնարավոր անկարգություններին արագորեն արձագանքելու համար: Ցուցարարներն այստեղ ակցիայի են դուրս եկել Դոնալդ Թրամփի ծաղրանկարներով ու տարբեր կարգախոսներ վանկարկելով:
Իսկ Երուսաղեմի Հայոց պարտիարքարանից մեր թղթակցին հայտնել են, որ հայ համայնքին վտանգ չի սպառնում: Պատրիարքարանի ներկայացուցչի փոխանցմամբ՝ թաղամասը, որտեղ տեղի են ունենում ցույցերն ու անկարգությունները, հեռու է հայկական թաղամասից: Հիշեցնենք, որ Դոնալդ Թրամփը հայտարարել էր Երուսաղեմն Իսրայելի մայրաքաղաք ճանաչելու մասին եւ կարգադրել ամերիկյան դեսպանությունը Թել Ավիվից Երուսաղեմ տեղափոխել: Այս հայտարարությունից հետո Պաղեստինում զանգվածային գործադուլներ են սկսվել, մարդիկ փողոցներ են դուրս եկել, ամերիկյան դրոշներ այրել, իսկ Հորդանան գետի արեւմտյան ափին բախումներ են գրանցվել պաղեստինցի եւ իսրայելցի զինծառայողների միջեւ: Երկու կողմից էլ հաղորդում են տուժածների մասին:
France Football-ն ամփոփել է «Ոսկե գնդակի» քվեարկության արդյունքները. երկրորդ տարին անընդմեջ Եվրոպայում հանդես եկող լավագույն ֆուտբոլիստ է ճանաչվել Մադրիդի «Ռեալի» եւ Պորտուգալիայի հավաքականի առաջատար Կրիշտիանու Ռոնալդուն: Պորտուգալացի ֆուտբոլիստն այս մրցանակին արժանացավ 5-րդ անգամ՝ հավասարվելով «Բարսելոնա»-ի արգենտինացի հարձակվող Լիոնել Մեսիին: Վերջինն այս տարվա քվեարկության արդյունքներով երկրորդն է, իսկ լավագույն եռյակը եզրափակում է բրազիլացի Նեյմարը: Նշենք, որ այս եռյակը գլխավորում էր նաեւ ՖԻՖԱ-ի տարվա լավագույն ֆուտբոլիստների վարկանիշը: Այստեղ նույնպես Ռոնալդուն առաջին հորիզոնականում է, Մեսին՝ երկրորդ:
Երեւանի բացվեց ձմեռային ժամանցի շատերի սիրելի վայրը՝ Կարապի լճի բացօթյա սահադաշտը: Հանդիսավոր բացման միջոցառմանը մասնակցել են Իրինա Ռոդնինայի անվան գեղասահքի դպրոցի սաները: Նշենք, որ սահադաշտը գործելու է մինչեւ հաջորդ տարվա մարտի 1-ը:
Դեկտեմբերի 8-ին դոլարն աննշան, իսկ եվրոն կտրուկ արժեզրկվել են: Դոլարի փոխարժեքը կազմել է 485 դրամ, եվրոյինը՝ 569, ռուբլունը՝ 8 դրամ 18 լումա, ֆունտինը՝ 653 դրամ:
Դեկտեմբերի 9-13-ը հանրապետությունում սպասվում է առանց տեղումների եղանակ: Օդի ջերմաստիճանը 4-5 աստիճանով կնվազի: Երեւանում նույնպես հանգստյան օրերին տեղումներ չեն սպասվում: Մայրաքաղաքում գիշերը կդիտվի -4-6 աստիճան ցուրտ, ցերեկը՝ +3+5 աստիճան տաքություն: