Գերմանիայի եւ Հայաստանի միջեւ կրթական եւ մշակութային հարաբերությունները դինամիկ զարգացում են ապրում։ Այս մասին NEWS.am-ի թղթակցի հետ զրույցում նշել է Հայաստանում Գերմանիայի արտակարգ եւ լիազոր դեսպան Մաթիաս Քիսլերը։
Նրա փոխանցմամբ՝ երկու շաբաթից Հայաստանում կբացվի Գյոթեի ինստիտուտը, որը կիրականացնի ոչ միայն կրթական գործունեություն, այլեւ կենտրոնացած կլինի մշակութային ծրագրերի վրա։ «Ինչ վերաբերում է կրթությանը, ապա շարունակաբար նպաստելով Հայաստանում գերմաներենի իմացության խորացմանը՝ մենք հնարավորություն ենք տալիս հայ երիտասարդներին որակյալ կրթություն ստանալ Գերմանիայի համալսարաններում»,-նշեց դեսպանը։
Հայ-գերմանական հարաբերություններում դեսպանը կարեւորել է նաեւ տնտեսական բաղադրիչը․ «Մենք աշխատում ենք ավելի շատ ներդրումներ Հայաստան բերելու եւ երկկողմ առեւտուրը ավելի ակտիվացնելու ուղղությամբ։ Իսկ ԵՄ-ի հետ համապարփակ եւ ընդլայնված համաձայնագիրը կարեւոր ազդակ կարող է լինել գերմանական ներդրողների եւ գործարար շրջանակների համար։ Այս համաձայնագիրը հնարավորություն է բացում բարեփոխումների եւ մոդեռնիզացիայի համար, իսկ դրանք կարեւոր են ներդրողներին հետաքրքրելու համար»։