Իրավապահները խոչընդոտել են Օդեսայի մարզի նախկին նահանգապետ Միխայիլ Սաակաշվիլիի կողմնակիցներին վրաններ խփել Ասկոլդովո նրբանցքում գտնվող ժամանակավոր պահման մեկուսարանի մոտ, հայտնում է «112 Украина»-ն:
Ցուցարարները հայտարարել են, որ ցանկանում են «խաղաղ վրաններ տեղադրել»: Ոստիկաններից մեկը դա «հասարակական կարգի խախտում» է որակել: Մի քանի բախումներ են տեղի ունեցել: Ուժայինները արցունքաբեր գազ են կիրառել: Տեսանյութը հրապարակվել է Սաակաշվիլիի Facebook-ի էջում:
Կիեւում անվտանգության ծառայության վարչության մոտ, որտեղ գտնվում է Սաակաշվիլին, հանրահավաք է անցկացվում: Քաղաքական գործչի կողմնակիցները տակառներ եւ փայտ են բերել, նաեւ աուդիո եւ տեսասարքեր: Ցուցարարները սկսել են ելույթ ունեցողների համար բեմ պատրաստել եւ բարիկադներ կառուցել: Ավելի ուշ հայտնի է դարձել, որ Սաակաշվիլին իր փաստաբանի միջոցով մեկուսարանից հայտարարություն է փոխանցել, որում իր կողմնակիցներին կոչ է արել շարունակել խաղաղ ակցիաները: Քաղաքական գործիչն անժամկետ հացադուլ է հայտարարել: