Երբ որ մենք հայտարարում ենք, որ կոռուպցիայի նկատմամբ լինելու է անհանդուրժողականություն, դա նշանակում է, որ յուրաքանչյուր փաստ լինելու է քննության առարկա: Այս մասին, այսօր՝ դեկտեմբերի 9-ին, հակակոռուպցիոն մրցանակաբաշխության շրջանակներում, լրագրողների հետ զրույցում նշել է ՀՀ գլխավոր դատախազ Արթուր Դավթյանը:
«Իսկ թե քննության արդյունքներով ում պատասխանատվության ենթարկելու ինչ հիմքեր կհայտնաբերվեն, մենք այստեղ գտնվում ենք իրավական մեկ այլ՝ ոչ կարեւոր հարթության մեջ, որը պարտավոր ենք ապահովել: Ձեր կողմից թվարկած եւ բազում այլ գործեր կարող են լինել, որոնցով որեւէ մեկի արարքում հանցակազմի հատկանիշները չհիմնավորվեն»,-ընդգծեց Արթուր Դավթյանը ` անդրադառնալով նախընտրական շրջանում տեղի ունեցած աղմկահարույց դեպքերին՝ «Զիբիլիքիսի» գործին, դպրոցների տնօրենների եւ «ՍԱՍ գրուպում» տեղի ունեցած ձայնագրություններին:
Հարցին՝ կարծում եք այդ գործերով քրեական տարրեր ի հայտ չեկա՞ն, գլխավոր դատախազը պատասխանեց. «Ոչ թե կարծում եմ, այլ գործով ձեռքբերված տվյալները միանգամայն դրա մասին են վկայում: Եթե գործը դատարան չի գնացել, անձը դատի չի տրվել, դա նշանակում է, որ ապացույցները բավարար չեն եղել, ուրիշ որեւէ պատճառ այստեղ չի եղել»:
Հիշեցնենք, որ մամուլում հրապարակվել էին տասնյակ դպրոցների տնօրենների հետ ձայնագրություններ, որոնք ցուցակագրում էին մարդկանց՝ հօգուտ ՀՀԿ-ի: Բացի այդ, «Ելք» դաշինքի ներկայացուցիչները ՀՀԿ շտաբի մոտ գտնվող աղբամանում գտել էին թղթեր, որոնք փաստում էին, թե ինչպես է ոստիկանությունն օժանդակում ՀՀԿ-ի ընտրության հարցում:
Նաեւ հրապարակվել էր «ՍԱՍ» գրուպում տեղի ունեցած նախընտրական ժողովներից մեկի ձայնագրությունը: Դրանում վարողը աշխատակիցներին պարտադրում էր ձայներ բերել ՀՀԿ տարածքային թեկնածու Արտակ Սարգսյանի օգտին՝ խոստանալով, որ շատ ձայներ բերողները կպարգեւատրվեն, իսկ չբերողները ընդհուպ կհեռացվեն աշխատանքից:
