Բրիտանացի ընտրողներն իրավունք ունեն հերթական համընդհանուր ընտրությունների ժամանակ ԵՄ-ից Մեծ Բրիտանիայի դուրս գալու հարցով համաձայնագրում փոփոխություններ պահանջել, եթե այն իրենց դուր չգա։ Այս մասին հայտարարել է շրջակա միջավայրի պաշտպանության եւ գյուղատնտեսության նախարար Մայքլ Գոուվը, հայտնում է The Daily Telegraph-ը։
«Իրավիճակը վերահսկելու է բրիտանացի ժողովուրդը։ Մինչեւ հաջորդ ընտրությունները ԵՄ օրենսդրությունն ու ԵՄ-ի հետ այլ համաձայնագրերը կդադարեն գերակայել բրիտանական օրենսդրության նկատմամբ։ Եթե բրիտանացի ժողովրդին դուր չգա համաձայնագիրը, որը մենք քննարկել ենք ԵՄ-ի հետ բանակցություններում, ապա այդ համաձայնագիրը թույլ է տալիս ապագա կառավարությանը հրաժարվել գործարքի իրացման գծից»,- ասել է նախարարը։
Գոուվի խոսքով՝ անցումային շրջանի ավարտին, որը կլինի Brexit-ից հետո, Մեծ Բրիտանիան լիակատար ազատություն կունենա միասնական շուկայի եւ մաքսային միության մասին ԵՄ օրենսդրությունից հրաժարվելու համար։