Եթե նախկինում Հայաստանում կար ավելի քան 900 համայնք, որոնք տարբեր հնարավորություններ ունեին, ապա հիմա՝ համայնքների խոշորացումից հետո, նրանց հնարավորությունները համեմատաբար հավասարվում են։ Այս մասին դեկտեմբերի 9-ին՝ Դիլիջանում ընթացող «ՀՀ համայնքների գիտաժողովի» ժամանակ, ասել է տարածքային կառավարման եւ զարգացման փոխնախարար Վարազդատ Կարապետյանը։
Նրա խոսքով՝ ցանկացած խոշոր կամ խոշորացված համայնքում կարելի է գտնել գոնե մեկ մասնագետի, որն ի վիճակի կլինի տնտեսական ծրագրեր մշակել։
«Հիմա մենք դիմել ենք բոլոր համայնքապետերին, որպեսզի նրանք գտնեն այդ մասնագետներին, եւ մենք կօգնենք նրանց պոտենցիալի զարգացմանը»,- պարզաբանել է Կարապետյանը՝ հավելելով, որ հաջորդ տարի կանցկացվի ավելի քան 10 ուսուցողական դասընթաց, որպեսզի այդ մասնագետները կարողանան համայնքների տնտեսական զարգացման ռազմավարություն մշակել եւ ենթակառուցվածքների զարգացման առանձին ծրագրեր՝ բիզնեսի ու գյուղատնտեսության համար։
