Արաբական պետությունների լիգայի ԱԳ նախարարները Կահիրեում ԱԳ նախարարների մակարդակով արտահերթ նիստում քննարկում են Երուսաղեմն Իսրայելի մայրաքաղաք ճանաչելու ԱՄՆ որոշումը։ Պաղեստինի ԱԳ նախարարի խոսքով՝ Վաշինգթոնի այդ որոշումը ամենալուրջ հետեւանքներն է ունենալու քաղաքականության եւ անվտնագության ոլորտում, փոխանցում է «ՌԻԱ Նովոստի»-ն։
Լիգայի գլխավոր քարտուղար Ահմեդ Աբու ալ Ղեյտը հայտարարել է, որ այդ քայլի պատասխանը կարող են դառնալ համաարաբական ջանքերը՝ ուղղված Պաղեստին պետության ճանաչմանը։ «Խաղաղասեր հանրությանը կոչ ենք անում մերժել ԱՄՆ որոշումը եւ պաշտանել պաղեստինյան պետությունը եւ հաստատել Արեւելյան Երուսաղեմը դրա մայրաքաղաք ճանաչումը»,- ասել է ԱՊԼ գլխավոր քարտուղարը։
ԱՄՆ նախագահը չորեքշաբթի Սպիտակ տանը հայտարարել էր, որ ժամանակն է Երուսաղեմը պաշտոնապես ճանաչել Իսրայելի մայրաքաղաք եւ Պետդեպարտամենտին հանձնարարել էր սկսել Թել Ավիվից դեսպանատունը Երուսաղեմ տեղափոխելու գործընթացը։
Երուսաղեմի կարգավիճակը պաղեստինա–իսրայելական հակամարտության առանցքային խնդիրներից է։ Իսրայելցիները 1967 թվականի պատերազմի ժամանակ զբաղեցրել էին քաղաքի արեւելյան հատվածը եւ պնդում են, որ Երուսաղեմը Իսրայելի միասնական եւ անբաժանելի մայրաքաղաքն է։ Պաղեստինցիները ցանկանում են քաղաքի արեւելյան հատվածը դարձնել իրենց պետության մայրաքաղաք։