Օտտավայի բնակչուհի Ֆորեստ Ատկինսոնը մտադիր է մինչեւ Սուրբ Ծնունդը, որը Հյուսիսային Ամերիկայում նշվում է դեկտեմբերի 25-ին, մայրաքաղաքի բոլոր ավտոբուսների 1,8 հազար վարորդներին մեկական շոկոլադ բաժանել: Այս մասին հաղորդում է CTV հեռուստաալիքը:
Շոկոլադին աղջիկը կցում է նաեւ տոնական բացիկ, որն ինքուրույն է պատրաստել:
Ատկինսոնը աշխատում է հիվանդ եւ դժվարաշարժ մարդկանց հետ եւ ամեն օր առավոտյան եւ երեկոյան ավտոբուսներից է օգտվում՝ իր հիվանդներին հասնելու համար:
Շոկոլադների մասին գաղափարը նրան հուշել է Անդրե անունով այդ հիվանդ մարդկանցից մեկը, որն անցյալ Սուրբ Ծնունդին մահացել է:
Այս տարի Ատկինսոնը դիմել է շոկոլադ արտադրող հայտնի ընկերության ներկայացուցչությանը, որպեսզի նրան ավտոբուսի վարորդների համար քաղցրավենիքի զեղչ անեն:
Սակայն ընկերությունն իրեն զեղչ չի արել, այլ 1,8 հազար շոկոլադն ուղարկել է անվճար:
