Նորք-Մարաշի զինված խմբի գործով որպես մեղադրյալ ներգրավված ՀՀ նախկին փոխվարչապետ Վահան Շիրխանյանի գործով դատարանում ներկայացված աղմկահարույցի ձայնագրությունը անօրինական է եւ իրավաբանական ուժ չունի: Այս մասին NEWS.am-ի հետ զրույցում ասաց Շիրխանյանի պաշտպան Հայկ Ալումյանը:
«Ապացույցը ձեռք է բերվել անօրինական ճանապարհով եւ անթույլատրելի է: Դատարանը այս առումով չնայած իր րավական գնահատականը չի տվել, թե դա անօրինական է, թե օրինական, դա ուղղակի մեղադրողն է ներկայացրել: Չնայած այդ ձայնագրությունը ֆիզիկապես կա, բայց իրավաբանորեն գոյություն չունի, այսինքն այդ ապացույցն անթույլատրելի է եւ չի կարող օգտագործվել»,-ասաց պաշտպանը` հավելելով, որ այդ ապացույցն անօրինական ճանապարհով է ձեռք բերվել, քանի որ գաղտնի է արվել եւ առանց դատարանի որոշման:
Հայկ Ալումյանը նշեց, որ Վճռաբեկ դատարանը այս առումով իրավական որոշում ունի, որով անօրինական է համարում նման կերպ ապացույցի ձեռք բերումը:
Նշենք, որ դատարանում հրապարակված ձայնագրության սղագրության մեջ նշվում է նաեւ նախկին Պաշտպանության նախարար Սեյրան Օհանյանի անունը:
Հիշեցնենք, որ 2015թ. նոյեմբերի 25-ին Ազգային անվտանգության ծառայությունը Երեւանում վնասազերծել է ծանր հանցագործություն կազմակերպելու մեջ կասկածվող խմբի: ԱԱԾ-ի փոխանցմամբ, նոյեմբերի 25–ին ԱԱԾ աշխատակիցները ոստիկանության հետ համատեղ տան խուզարկության ընթացքում հայտնաբերվել են տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր եւ պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք՝ այդ թվում զրահաբաճկոններ: Խուզարկության պահին առանձնատանը, Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները, որոնք ձերբակալվել են, ապա կալանավորվել:
ՀՀ ԱԱԾ քննչական վարչությունում հարուցվել է քրեական գործ ՀՀ քրեական օրենսգրքի 223-րդ հոդվածի 1-ի եւ 2-րդ մասերով եւ 235–րդ հոդվածի 3-րդ մասով, այն է՝ Հանցավոր համագործակցություն ստեղծելը եւ դրան մասնակցել եւ Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը: