Եվրոպական երկրները չպետք է միջուկային գործարքի ու Մերձավոր Արեւելքի հարցերում կրկնեն անցյալի սխալներն ու կուրորեն հետեւեն ԱՄՆ նախագահ Դոնալդ Թրամփի վարչակազմի որդեգրած կուրսին: Այդպիսի նախազգուշությամբ է հանդես եկել Իրանի արտգործնախարար Մոհամադ Ջավադ Զարիֆը՝ The New York Times-ում հրապարակված հոդվածում:
«ԱՄՆ-ի անհուսալիությունն այնպիսի հարցերում, ինչպիսիք են կլիմայի գլոբալ տաքացումը եւ Պաղեստինը, դառնում է կանխատեսելի: Լրջորեն անհանգստանալով՝ մենք նախազգուշացնում ենք եվրոպական երկրներին անվճռական չլինել այնպիսի հարցերում, ինչպիսին միջուկային գործարքն է, եւ Սպիտակ տան հետեւից միաձայն չհետեւել նրա գործողություններին», - նշել է արտգործնախարարը:
Նա հիշեցրել է, որ Իրանի միջուկային ծրագրի շուրջ գործողությունների համատեղ, համապարփակ պլանի կնքումից շատ առաջ Մեծ Բրիտանիան, Ֆրանսիան եւ Գերմանիան համոզել են Իրանին՝ ինքնակամ դադարեցնել ուրանի հարստացման աշխատանքները:
«Բանակցություններից 2 ամիս առաջ, ԱՄՆ-ի ազդեցության տակ, Մեծ Բրիտանիան, Ֆրանսիան եւ Գերմանիան հանկարծակի մեզանից պահանջեցին ամբողջապես դադարեցնել ուրանի հարստացումը: Բանակցություններն ընդհատվեցին, իսկ եվրոպացիները չհաջողեցին ոչ դադարեցնել մեր միջուկային ծրագիրը, ոչ էլ գոհացնել Վաշինգթոնին», - ընդգծել է Զարիֆը:
Նա Իրանի միջուկային ծրագրի շուրջ գործողությունների համատեղ, համապարփակ ծրագրի կնքումը համարել է «դիվանագիտության հազվադեպ հաղթանակ»: