ԵՏՄ անդամակցությունը եւ ԵՄ-ի հետ համաձայնագրի ստորագրումը յուրահատուկ կարգավիճակ են ստեղծում Հայաստանի համար։ Այս մասին այսօր՝ դեկտեմբերի 11-ին, մամուլի ասուլիսի ժամանակ հայտարարել է Ճապոնիայի արտակարգ եւ լիազոր դեսպան Էյջի Տագուչին
Շնորհավորելով Հայաստանին համաձայնագրի ստորագրման առթիվ՝ դեսպանը նշեց, որ նախորդ շաբաթ Ճապոնիան եւս ԵՄ-ի հետ ստորագրել է տնտեսական համագործակցության մասին համաձայնագիր։ «Սա եւս մեկ ընդհանրություն է։ Ճապոնիան եւ Հայաստանը կարող են ԵՄ-ի միջոցով ավելի սերտ համագործակցություն ծավալել»,-նշեց դեսպանը։
Միաժամանակ, արձանագրելով Հայաստանի անդամակցությունը ԵՏՄ-ում՝ դեսպանը ընդգծեց, որ Ռուսաստանը Ճապոնիայի շատ կարեւոր գործընկերն է։ «Ճապոնիան անմիջական մուտք ունի ռուսական շուկա։ Այսինքն՝ անհրաժեշտություն չկա, որ Հայաստանը միջնորդ լինի այս հարցում։ Սակայն ամեն դեպքում դա կարեւոր է»,-հավելեց դեսպանը։ Դեսպանի անձնական կարծիքով՝ Հայաստանը յուրահատուկ կարգավիճակում է՝ ԵՏՄ անդամակցությամբ եւ ԵՄ-ի հետ համաձայնագրի ստորագրմամբ։
Դեսպանի դիտարկմամբ՝ հայ երիտասարդները խոսում են ռուսերեն եւ անգլերեն: Նրա խոսքով՝ երկու հանգամանքներն էլ մեծ առավելություններ են տալիս. «Սա պետք է գրավի ձեռնարկատերերին, այդ թվում` Ճապոնիայից»: