Գործարքի գնի մեթոդով մաքսային ձեւակերպման մեխանիզմը պարզեցվել է:
Այս առնչությամբ, ՊԵԿ-ի տարածած հաղորդագրության մեջ նշվում է.
«Վերջին մեկ տարվա ընթացքում մի շարք փոփոխություններ են կատարվել մաքսային ձեւակերպումների գործընթացում: Արարատյան մաքսատուն-վարչության պետ Արմեն Սարգսյանի տեղեկացմամբ՝ պարզեցվել է նաեւ գործարքի գնի մեթոդով ձեւակերպման կարգը: «Եթե նախկինում գործարքի գնի մեթոդով մաքսային ձեւակերպման թույլտվությունը տրվում էր վերադաս մաքսային մարմնի կողմից, ապա այժմ, հայտարարատուն միանգամից դիմելով մաքսատուն՝ փաստաթղթերի արժանահավատության դեպքում կատարում է մաքսային ձեւակերպումները»:
Արդյունքում գործընթացը դարձել է պարզ, դյուրին եւ արագ. արտաքին տնտեսական գործունեություն իրականացնողների հավաստմամբ՝ զգալի կրճատվել է մաքսային ձեւակերպումների գործընթացը, ինչ թույլ է տալիս բարձր արդյունավետությամբ եւ ժամանակի տնտեսմամբ կազմակերպել աշխատանքը:
Կոմիտեի նախաձեռնությամբ մաքսային ձեւակերպումների շարունակական պարզեցմամբ կատարելագործվում են մաքսային գործընթացները՝ հօգուտ բիզնեսի: Արարատյան մաքսատուն-վարչությունում փաստում են, որ գործարքի գնի մեթոդով ձեւակերպման պարզեցված մեխանիզմը կարճ ժամանակահատվածում շոշափելի արդյունք է արձանագրել: Ըստ Արմեն Սարգսյանի, ավելացել է ոչ ռիսկային եւ ռիսկային երկրներից ներկրված ապրանքների գործարքի գնի մեթոդով ձեւակերպումների քանակը: Կարեւորելով բիզնեսին բարձրորակ եւ արագ ծառայություն մատուցելու, աշխատանքներն առավել արդյունավետ կազմակերպելու անհրաժեշտությունը, Արարատյանում եւս հետեւողական են կադրերի համալրման խնդրում. «Կադրային քաղաքականությունը մշտապես ՊԵԿ ղեկավարության ուշադրության կենտրոնում է: Մաքսային տեսուչների առջեւ խնդիր է դրվել՝ արագ, որակյալ եւ կիրթ սպասարկել հայտարարատուներին»,-վստահեցրել է կառույցի ղեկավարը:
Բարեփոխումների արդյունքում նորաստեղծ կառույցում նաեւ բյուջեի մուտքերի էական աճ է արձանագրվել՝ նախորդ տարվա համեմատ. «Եթե 2016-ի հունիս-նոյեմբերին նախկին 4 մաքսատների հանրագումարով պետբյուջե է մուտքագրվել 89 միլիարդ 178 միլիոն դրամ, ապա 2017-ի նույն ժամանակահատվածում՝ 121 միլիարդ 860 միլիոն դրամ: Աճը կազմել է 36 տոկոս»,-նշել է Արարատյան մաքսատուն-վարչության պետ Արմեն Սարգսյանը»:
