Հայաստանը առաջիկա տարիներին բավարար ուշադրություն պետք է դարձնի ընտրական գործընթացներին եւ դպրոցներում քաղաքական քարոզչության վերացմանը։ Այս մասին այսօր՝ դեկտեմբերի 11-ին, Համընդհանուր իրավունքների մրցանակաբաշխության արարողության ժամանակ հայտարարեց Հայաստանում ԵՄ պատվիրակության ղեկավար, դեսպան Պյոտր Սվիտալսկին։
Նրա համոզմամբ՝ արդարությունը կարող է ուշանալ, սակայն օր օրի արդարության նկատմամբ հասարակական պահանջը մեծանում է, իսկ արդարությունը առանց թափանցիկության անհնար է։ «Թափանցիկությունը շատերի դեպքում անհարմարություն է առաջացնում, բայց թափանցիկության շնորհիվ հնարավոր է դառնում հասարակությունը ավելի լավը դարձնել»,-նշել է նա։
«Արդարություն եւ թափանցիկություն» մրցանակի դափնեկիր Դանիել Իոնիսյանն էլ իր հերթին նշեց, որ մեծամասնությունը, այդ թվում, իրենց թիմի ներսում համոզմունք էին հայտնում, որ ընտրություններում ամեն ինչ կանխորոշված է, բայց իրենք չհամակերպվեցին այդ մտքի հետ,այդ թվում՝ ձեռնարկելով հետաքննական բնույթի գործողություններ։ «Ամեն ինչ կանխորոշված կլինի, երբ մենք սկսեենք համակերպվել այն մտքի հետ, որ հնարավոր չէ այլեւս ոչինչ փոխել»,-նշեց նա։
Նշենք, որ Համընդհանուր իրավունքների մրցանակաբաշխությունը միջազգային համայնքի առաջին համատեղ նախաձեռնությունն էր, որով 2012թվականից նշանավորվում են մարդու իրավունքների առաջխաղացման ոլորտում Հայաստանի քաղաքացիական եւ քաղաքական իրավունքների ակտիվիստների, պետական պաշտոնյաների, լրատվամիջոցների եւ քաղաքացիական հասարակության ներկայացուցիչների ունեցած ներդրումները: Միջոցառումը այս տարի կազմակերպել էին ԱՄՆ դեսպանությունը, Գերմանիայի Դաշնային Հանրապետության դեսպանությունը, Հայաստանում Եվրամիության պատվիրակությունը, Մեծ Բրիտանիայի եւ Հյուսիսային Իռլանդիայի Միացյալ Թագավորության դեսպանությունը, Ֆրանսիայի Հանրապետության դեսպանությունը, Միավորված ազգերի կազմակերպության հայաստանյան գրասենյակը եւ Եվրոպայի խորհրդի երեւանյան գրասենյակը։