Օդեսայի նախկին նահանգապետ, «Նոր ուժերի շարժում» կուսակցության առաջնորդ Միխայիլ Սաակաշվիլիի փաստաբանները Կիեւ քաղաքի Պեչերսկի շրջանային դատարանին են հանձնել Ուկրաինայի 10 ժողովրդական պատգամավորների դիմումը, որով նրանք հավաստում են, որ պատրաստ են անձնական պատասխանատվության տակ վերցնել ձերբակալվածին, փոխանցում է ՈՒՆԻԱՆ–ը։
Փաստաբան Ռուսլան Չեռնոլուցկին կարդացել է պատգամավորների անունները, որոնք պատրաստ են պատասխանատվություն ստանձնել Սաակաշվիլիի համար։
«Ես ուզում եմ կարդալ այն մարդկանց անունները, որոնց անունից մենք անձնական լիազորություն ենք ներկայացնում։ Դրանք են Օպանասենկոն, Դերեվյանկոն, Կոստենկոն, Նովակը, Տիմոշենկոն, Կուպրին, Կրուլկոն, Դոբրոդոմովը, Լուցենկոն, Կիեւի քաղաքային խորհրդի պատգամավոև Դիդովեցը եւ Գրիցենկոն»,– ասել է Չեռնոլուցկին։
Դատավոր Ցոկոլը, ով որոշում է Սաակաշվիլիի խափանման միջոցը, դիմումը կցել է գործի նյութերին։ Մեղադրող կողմը դեմ չի եղել։
Ավելի վաղ դատարանը մերժել էր դատախազ Ալեքսանդր Գովորուշչակի ինքնաբացարկի մասին Սաակշվիլիի փաստաբանների միջնորդությունը։