Նյու Յորքում պայթյունը ահաբեկչական միջադեպ էր, հայտարարել է ոստիկանության կոմիսար Ջեյմս Օ՛Նիլը։ Նա նշել է, որ ձերբակալվածը դիտավորյալ է պայթեցրել սարքը։ Պատասխանելով հարցին, թե կասկածյալը ԻՊ–ի հետ կապ ունի արդյոք, կոմիսարն ասել է, որ ձերբակալվածը հայտարարություն է արել, սակայն դեռեւս չի պատրաստվում այն բարձրաձայնել։
Նյու Յորքի քաղաքապետ Բիլլ դե Բլազիոյի խոսքով՝ կասկածյալը կալանքի տակ է։
Իշխանությունները պայթուցիկը որակել են որպես «հանպատրաստից ցածր տեխնոլոգիական պայթուցիկ սարք», որը գոտիով եւ կպչուն ժապավենով ամրացրած է եղել կասկածյալի մարմնին։
GMA–ի աղբյուրները հայտնում են, որ ձերբակալվածը 27-ամյա տղամարդը Բանգլադեշի քաղաքացի է, ով վերջին 7 տարիներին ապրում է Բրուքլինում։ Պայթյունից տուժել է 4 մարդ, այդ թվում` կասկածյալը: Շարժառիթը դեռեւս հայտնի չէ:
Նյու Յորքի քաղաքապետը միջադեպը որակել է ահաբեկչության փորձ՝ նշելով, որ բարեբախտաբար կասկածյալին չի հաջողվել հասնել իր նպատակին։