Սննդամթերքի անվտանգության պետական ծառայությունը լայնամասշտաբ ուսումնասիրություն է իրականացնում: Այս մասին այսօր՝ դեկտեմբերի 12-ին, լրագրողների հետ հանդիպմանն ասաց Գյուղատնտեսության նախարար Իգնատի Առաքելյանը՝ անդրադառնալով քաղաքացու բողոքին, թե Հայաստանյան շուկայում վաճառվում է պլաստիկ բրինձ:
«Մեզ չի կարող դա չմտահոգել, սակայն ՍԱՊԾ-ն այժմ մոնիտորինգ է իրականացնում, ամբողջ խմբաքանակն ուղարկվել է ստուգման, հետեւաբար, այս պահին որեւէ մեկնաբանություն տալ չեմ կարող»,- ասաց նախարարը:
Հիշեցնենք, որ լրագրող Նարինե Կիրակոսյանի՝ բրնձի տհաճ հոտի եւ պամելոյի մեջ նկատված մուգ բծերի վերաբերյալ դիմում-բողոք էր ներկայացրել Գյուղատնտեսության նախարարության սննդամթերքի անվտանգության պետական ծառայություն: Այդ բրինձը Հայաստան է ներմուծվել Ռուսաստանի Դաշնությունից, ներմուծող ընկերությունը «Արմեն-Համիկ» ՍՊԸ-ն է, որի պահեստից ՍԱՊԾ աշխատակիցները հայտնաբերել էին 130 կգ բրինձ, որից նույնպես նմուշ է ուղարկվել լաբորատոր փորձաքննության: Այս խմբաքանակի իրացումը, ըստ ՍԱՊԾ-ի, կասեցվել է՝ մինչեւ արդյունքների պարզ լինելը:
