Ռուսաստանում 2017 թվականին 61 ահաբեկչական հանցագործության դեպք է կանխվել, դրանց թվում`18 ահաբեկչական գործողության։ Այս մասին, ՏԱՍՍ-ի փոխանցմամբ, հաղորդել է Ռուսաստանի Դաշնային անվտանգության ծառայության տնօրեն, ահաբեկչության դեմ պայքարի ազգային հանձնաժողովի նախագահ Ալեքսանդր Բորտնիկովը։
«Ստացված տեղեկությունների վերլուծության արդյունքները վկայում են միջազգային ահաբեկչական կազմակերպությունների ղեկավարների կողմից Ռուսաստանի տարբեր շրջաններում ահաբեկչական գործողության օջախներ ստեղծելու շարունակական փորձերի մասին», - ասել է Բորտնիկովը:
«Այս միտումների վկայությունն են Սանկտ Պետերբուրգում եւ Խանտի-Մանսիյսկի ինքնավար մարզում ահաբեկչական գործողությունները, նախապատրաստման փուլում ահաբեկչական բնույթի 61 հանցագործությունների, այդ թվում՝18 ահաբեկչական գործողությունների կանխարգելումը»,-ասել է նա:
Դաշնային անվտանգության ծառայության ղեկավարը նշել է, որ ահաբեկչական հարձակումները նախատեսում էին իրականացնել բազմամարդ վայրերում եւ ռազմավարական նշանակության օբյեկտներում:
Բորտնիկովն ավելացրել է նաեւ, որ այս տարի դադարեցվել է 56 գաղտնի ահաբեկչական խմբավորման գործունեություն:
Բացի դրանից, նրա խոսքով, այս տարի Ռուսաստանում ձերբակալվել է ավելի քան 1000 զինյալ, 78-ն էլ ոչնչացվել են: «2017 թ. ընթացքում ահաբեկչության դեմ պայքարի ազգային հանձնաժողովի եւ Դաշնային օպերատիվ շտաբի կոորդինացմամբ համակարգված միջոցառումներ են իրականացվել, որի արդյունքում 1 մլն 18 հազար հոգի ձերբակալվել է, 78 բանդաներ եւ նրանց աջակիցները էլ՝ չեզոքացվել»:
Նրա խոսքով՝ ահաբեկչական գործողությունների մեջ կասկածվող ավելի քան 17.5 հազար օտարերկրյա քաղաքացիների արգելվել է մուտք գործել Ռուսաստան:
Նա նաեւ նշել է, որ արգելվել է 80 հոգու ելքը արտասահման, ովքեր գտնվել են միջազգային ահաբեկչական կազմակերպությունների գործակալների ազդեցության տակ եւ ծրագրել են միանալ ահաբեկիչներին: